Champions League-ah Manchester United chu 4-1 ngawta Como laka an tlawm hnuah, club captain Bruno Fernandes-a'n team tactics a sawisel chu United goal khung hnem ber Wayne Rooney chuan a pawm lo hle.

Season inṭan aṭanga match 11 chauh a la liam tihin Old Trafford-ah boruak a ṭha lo hle a, manager Michael Carrick-a hma hun pawh a thim chho mek a ni. Italy-a inkhelah khan United hian shot nei hnem ve bawk mah se an pet out hnem hle a, mualneitu lamin goal li ngawt an khung thung a. Match zawhah Carrick chuan hmun hla tak aṭanga rawn fehchhuak fan 700-te hmaah ngaihdam a dil nghe nghe a ni.

Match zawha TNT Sports nen an inbaknaah Fernandes chuan tactics a sawisel a, "Coaching staff-ten man-to-man pressing hmang lova, khingpui hmunawl pe zawnga khel tura min tih vang a ni a, hetianga hmunawl peka inkhelh hian khingpuite an inrintawk phah ṭhin," tiin a sawi a ni.

Hemi chungchang hi Carrick-a hnenah an zawh chuan, "Second half-ah khan man-to-man-in kan nawr ve ngei a, goal kan chhuah ta tho a ni. Eng tactics pawh hmang ila, khelmualah i tlan peih lova, hmalam leh hnunglam i nawr peih lo a nih chuan i chak ngai lo ang," tiin captain Bruno-a hnenah chhanna khauh tak a pe thung.

The United Stand-a a inlan ṭumah Rooney chuan Fernandes-a'n Carrick-a laka pressure a siam avangin a chhuahchhah hle. Kar liam ta khan Lisandro Martinez pawhin technical director Jason Wilcox leh board member-te a lo sawisel tawh a, hei hi Rooney chuan dressing room tichhetu a nih thu a lo sawi tawh barm a ni.

Rooney chuan, "Martinez-a'n khatianga thu a sawichhuah khan dressing room a tichhia ang tih ka lo sawi tawh a, tunah Bruno-a'n a rawn chhunzawm leh ta a ni. A chhan chu mawhphurhna lak an duh loh vang a ni. Bruno-a thusawi kha a dik emaw dik lo emaw, khelmual chhungah chuan team angin mawhphurhna i lak thiam a ngai a ni," a ti.

Manchester United player neih mek-te chu "mahni hmasial" tiin Rooney chuan a sawise zui a, "Heng player-te hi an mahni chauh inngaihtuah, mahni hmasial an ni. An team-mate te, manager te, staff te leh fan-te engmah an ngaihtuah lo. Thil a kal ṭhat loh hlek hian naute angin an phili a, mawhphurhna la lovin midang lakah mawh an puh leh ta ṭhin a ni," tiin Rooney chuan a sawi.

Fernandes-a chungchang sawi chhunzawmin, "Amah ngei pawhin hmachhawn a duh loh avangin midang lakah pressure a siam zawk a ni. Bruno leh Martinez-a te hian darthlalangah inbihchiang se, an mahni chiah an in-hmu ang a, hei hi a tawk lo hle a ni. Khelmualah an thawhhlawk lehzual a ngai a ni," tiin a tlip ta a ni.