Manchester United director of football hlui John Murtough chuan English football-ah a kir lehna tan Championship club Birmingham City-a football director hna chelh turin inremna a ziak fel ta. Hei hi United a chhuahsan hnua English football-a a vawikhat kir lehna a ni.
Murtough hi kum 11 chhung zet Old Trafford-ah hmun hrang hrang luahin a lo awm tawh a. Kum 2021 khan director of football atan ruat niin, kum thum dawn he hna hi a lo chelh tawh a ni. Kum 56 mi hian 2022 nipui lai khan Erik ten Hag chu manager atana ruatna kawngah mawhphurhna pawimawh tak a lo la tawh bawk.
Sir Jim Ratcliffe-a'n United-a share a lei hnu, April 2024 khan Murtough hian a hna hi a chawlhsan a. Khatih lai khan Ratcliffe chuan, "John-a lo thawk rim tawh em emna leh intihsiamsakna hun chhunga min lo thlawpna zawng zawngah lawmthu kan hrilh a ni. A hmakhua atan duhsakna sang ber kan hlan e," tiin thuchhuah a lo siam tawh a ni.
United a chhuahsan hnu hian Italian club Atalanta-ah Director of Global Development hna a chelh rih a, hemi hma pawh hian Premier League, Everton, Fulham leh Coventry City-ah te hmun pawimawh hrang hrang a lo luah tawh bawk a ni.
Birmingham City thuchhuah nemnghet chuan, "Birmingham City hmasawnna kawnga hun pawimawh takah hian a rawn inlan a ni. Knighthead chuan club tana khelmual chhung leh pawna ruahmanna lian tak takte bawhzuiin, Europe rama sport regeneration project lian berte zinga mi tur 'Sports Quarter' te leh stadium thar ṭha tak din an tum mek a ni," tiin a tarlang.
Club thuchhuah chuan tarlang chhunzawmin, "Murtough hian men's first team, academy, recruitment, performance, data leh football operations zawng zawngte a pui bawr vek ang. Head coach Chris Davies leh hruaitu awmsate nen thawhdun zelin, team-in hlawhtlinna an neih theih nan hruaina leh support ṭha ber pek a tum ang," tiin an sawi a. Hei bakah hian Hope Powell nen thawhdunin hmeichhe team (Women's team) hmasawnna pawh an ngaihsak zui zel dawn tih an tarlang bawk a ni.
Birmingham board chuan lawmthu sawiin, "John-a hi Birmingham City-ah kan lo lawm hle a ni. A tir aṭangin he club leh Birmingham khawpui tana kan thiltum hi kan sawi chiang tawh a, English football-a a sang ber kengkawh thei tura inbuatsaih kan tum a ni. John hian elite football-ah kum 30 dawn tawn hriat a lo nei tawh a, Chris-a te nen kan hmabak thar hmachhawn turin an thawkho dawn a ni," an ti.
Murtough chuan a phur thu sawiin, "Birmingham City ka zawm thei hi ka hlim takzet a ni. Fan-te an ṭha em em a, potential lian tak nei club a ni. Knighthead lamin rei tak daih tur thil ropui tak din an tum zia a lang reng a ni. Ka rilru ber tur chu Chris-a leh football team-te fawmkhawma, hlawhtlinna an neih theih nana hmun ṭha ber siamsak leh recruitment leh academy aṭanga player chher chhuah zel hi a ni," tiin a sawi a ni.
