September thlaa club chhuahsan a dil hnuah, Manchester United rawlthar kum 16 mi JJ Gabriel chuan Old Trafford chhuahsan a hnaih ta hle. He rawlthar hi FIFA phalna a hmuh veleh Real Madrid pan mai tur anga sawi a nih laiin, United legend Ryan Giggs chuan Gabriel-a aiawhtute chet dan chu sawiselin, rawlthar hmasawnna tithuanawm zawnga che lo turin thurawn a pe a ni.
September thla khan Gabriel-a aiawhtute chuan thutlukna siam a nih danah lungawi lovin, United hnena a inziaktluhna tihtawp dilna (deregistration request) an lo thehlut tawh a ni. A aiawhtute hian first-team-ah inlantir nghal an nawr a, Champions League-a Sabah nen an inkhelh ṭum te, Carabao Cup-a Brighton an hmachhawn ṭum leh Premier League-a Bournemouth an tum ṭumte khan khelhtir ngei an duh a ni. Mahse Sabah laka inkhel tur UEFA squad-ah he naupang hming hi telh a ni lo thung.
A nihna takah chuan United hian Brighton laka Carabao Cup match-ah khan Gabriel hi khelhtir an lo ruahman sa tawh a, mahse he match inkhelh hmain a aiawhtute chuan club chhuahsan dilna hi an lo thehlut hman hlauh a ni. Kha zan khan mualah inlan ta se, kum 16 mi Gabriel hi United chanchina senior team tana inlan naupang ber a ni hial dawn a ni. September thla aṭang khan he rawlthar hi Carrington-ah training zawm turin a inlar tawh lo va, Barcelona hnaiha Castelldefels-ah mimal coach-te nen training a nei thung a ni.
Giggs-a'n he rawlthar hi a hmain "hnam khat chhunga zinga mi danglam bik" (generational talent) tiin a lo fak tawh ṭhin a. Mahse tun kar khan Rio Ferdinand-a YouTube channel-a an kawmnaah, Giggs chuan rawlthar aiawhtute'n Manchester United chhuahsan tura an nawr liam kual tak vak mai chu mak a tih thu a sawi ta a ni.
Giggs chuan, "A career-ah tun thlengin engkim a kal tluang vek a, engati nge a hmasawnna kawng zawh mek tihtawp i tum ngawt ang? Kawng dik tak a zawh mek a ni," tiin Ferdinand a hrilh.
Sawi chhunzawmin Giggs chuan, "Kum 15 ka nihin senior team nen training ka nei ṭan a, mahse kum hnih a liam hma chu first team-ah ka khel lo hrim hrim. Chuvang chuan dawhtheihna neih a ngai a ni, tun lai naupangte hian dawhtheihna an nei lo hle mai. Man United first-team football-a khelh leh youth team-a khelh emaw, pre-season friendly khelh chu inang lo tak a ni. Match hmasaberah i che ṭha viau maithei, mahse season khatah game 40 emaw 50 emaw i khelh a ngai dawn a ni. Hliam te i tuar ang a, i chet chhiat chang leh inkhelh an tlawm chang pawh a awm ang, chuvangin dawhtheihna neih tam a ṭul a ni," tiin a sawi.
Wales winger hlui chuan sawi zawmin, "Kawng dik tak zawh lai i nih chuan, eng phet pawh ni la hun ṭha a thlen teihteisena nghah ngai a ni. Arsenal-a Max Dowman pawh thiam tak a ni, mahse tunah Arsenal tan a la khel bik lova. Ani pawhin dawhthei takin a hun a nghak mai a ni, a dawhthei lo hle tawh bawk ang tih ka hria, mahse phili lovin a awm hle hle a, kum engemaw zat hnua Arsenal player pawimawh ber a la nih tur zia a hria a ni," tiin thurawn mawi tak a pe bawk.
United hotute chuan a tirah inremna siam dan kawng an zawng hle a, mahse Gabriel-a'n chhuah a tum ngheh tlat avangin Old Trafford chhuahsan chu a thleng ngei dawnin a lang ta. Pre-season chhung khan Stockholm-a Atletico Madrid nena an inkhelh ṭum khan Michael Carrick-a'n senior squad-ah a vawikhat nan a inlantir a, mahse hemi hnu pre-season match dangah erawh minute khat pawh a khelh chhunzawm tir leh ta lo a ni.
