September leh October inkara international break chhung hian Manchester United senior team player-te chauh lo pawh, an youth academy aṭanga ram hrang hrang aiawha duty nei rawlthar engemaw zat an awm a ni.

He ram aiawha khelh theihna hunṭha hi player naupangte tan tawn hriat inchher nan leh rival hrang hrang te, teammate hrang hrangte nena intah hriamna atan hun pawimawh tak a ni a. Manchester United tana chanchin lawmawm tak chu Thawhlehnia England U19-in Norway 2-1 a an hneh ṭum khan club academy chhuak rawlthar pahnih an inlan ve hlauh hi a ni.

Republic of Ireland laka 1-0 a hnehna an lo chan tawh hnuah, England U19 hian Norway lakah 2-1 in hnehna an chang chhunzawm leh ta a, match li a zawnin an chakna a ni ta bawk. First-half chhungin Luca Williams-Barnett leh Alejandro Rodriguez te goal khung hmangin Young Lions te hian 2-0 in hma an hruai a ni.

United defender pahnih Albert Mills leh Bendito Mantato te tan erawh second half inṭan aṭanga minute thumna lekah Norway-in goal khat an rawn khung tak avangin clean sheet erawh an nei thei ta lo thung. Chutih rualin, international stage-a an ram hlawhtlinnaah hian thawhhlawk takin mawhphurhna an hlen zui tho a ni.

Ben Futcher-a enkawl team hian Zirtawpni zanah United States an hmachhawn leh dawn a, Mills leh Mantato te hian bul ṭan leh ngei an beisei hle. Hei hi Carrington-a an kir leh hmaa an match hnuhnung ber tur a ni ang a, hemi hnu hian an club Manchester United-ah an rilru an fuk tir leh ang. Senior team-a inzehit a, United academy graduate puitling nih an duh a nih chuan Carrington-ah rim tak leh ngawrh taka ṭan lak an mamawh dawn a ni.

Full-back position-a khel ṭhin Mantato tan phei chuan, senior team manager Michael Carrick-a squad-a he position-a chhawr tur an indaih loh dan te enin, a khelh dan siamṭha a, theihna sang zawk phochhuak tura ṭan lak a phurawm zual hle dawn a ni.

Kum 18 mi ve ve la ni Mantato leh Mills te hian hma hun eng tak an la nei a, Manchester United coaching staff te pawhin an hmasawnna kawngah theih tawp chhuahin an kaihruai chhunzawm zel dawn a ni.