Thawhlehnia Australia laka Brazil 4-2 a an chak ṭum khan, second half-ah Manchester United midfielder Andrey Santos chu khelmualah a rawn lut a. International break chhung hian Matheus Cunha chu Brazil squad-ah a tel ve loh avangin, nipui bazar laia £48m-a United-in an lakluh kum 22 mi Santos hi Selecao tana United aiawh awmchhun a ni ta a ni.
Tun season bul ṭan aṭangin Old Trafford-ah Santos hian inkhelh theihna hun a chang meuh lo a, starting eleven-ah pawh hmun nghet a la chang lo. Michael Carrick-a chungah sawiselna leh pressure a san chhoh mek lai hian, he Brazilian rawlthar hian a manager rinna a la hlawh tawk lo hle niin a lang. Mahse Brazil boss Carlo Ancelotti erawh chuan he tlangval theihna hi a la ring tawk reng a, Australia rama an zinnaah pawh a chhawr zui ta reng a ni.
Kar liam taa Australia nena 1-1 a an inhnehtawk ṭum khan Ancelotti chuan Santos hi a lo chhawr duh miah lo a, bench-ah a ṭhuttir char char a nih kha. Hemi avang hian Brazil coach ruahmannaah a pawimawh tawk lo nia ngaih a nih laiin, Thawhlehni khan khelmualah minute 30 chuang khelh theihna hun a pe ve leh ta thung a ni.
Minute 30 chuang a khelh chhung hian nghawng erawh a nei ve nual a. Brazilian media lar Ge Globo chuan Brazil goal thumna an thun theih nana a inrawlh dan chu fak sakin, "goal thumna an zawn ṭannaah ball a khawih ran avangin a thawhhlawk hle," tiin an ziak. Mahse match rating-ah 6/10 chauh pein, a pass a fuh tawk lo a, ball a chan laiin a langsar tawk lo tiin an sawisel bawk; he inkhelah hian pass vawi 17 a tum zinga 13 chauh a hlawhtling a ni.
United tana nambar 17 ha mek pawh hian Goal Brasil hnen aṭangin fakna ṭha lutuk a dawng bik lo a, 6/10 bawk an pe ve a. A rawn luh hnuah midfield a ti nghet a, duel vawi 5 a chhuhsak bakah defensive-ah vawi 4 a inrawlh thei chung pawhin an fak liam mai mai a ni.
Heng thlirlatute hian Santos-a khelh dan chu chhuang em em lo mah se, sawiselna na ber thehluttu chu Brazilian outlet GZH a ni thung. GZH chuan 5/10 chauh an pek bakah kum 22 mi hnenah hian, "National Team-a mi pawimawh i nih theih nan i theihna pholan belh i la mamawh cheu a ni," tiin thuchah khauh tak an tarlang zui a ni.
Santos hi tun dinhmunah chuan Brazil tan pawh hian inlan tam zawk awm tak a ni a, tlar laili player dang ṭhenkhat ai pawhin a khel thiam zawk hial mai thei; mahse Ancelotti hian inkawp dan hrang hrang a la fiah kual mek a, match lehah hunṭha a nei leh maithei a ni.
Tun season-ah United tan inkhelh tam theihna hun a neih meuh loh avangin, tun kar tawpa India an hmachhawn hunah minute 90 chhung khelh theihna hun nei thei hlauh se chuan, inrintawkna leh fitness ṭha nei chunga international break zawha club pan leh nan hunṭha tak a ni ang. Mahse thil chiang tak pakhat awm chu, Brazil starting line-up-a hmun nghet chang tura beisei a nih chuan a aia ṭha leh danglam zawk a pholan a ngai hle a ni.
