Manchester United chuan international break a awm avangin chawlhkar khat aia thui zet match khel lovin hun an hmang mek. Michael Carrick-a squad aṭangin player 13 zet chu an ram aiawha khel turin koh an ni hman a, mahse hliam vangin mi engemaw zat an inhnukdawk leh a ni.
Marcus Rashford, Kobbie Mainoo, Karl Darlow leh Benjamin Sesko te chuan an ram team-te an zawm lo a, Denmark tana a khelh laia a malpui hliam tuar Patrick Dorgu pawh Carrington-ah a kir leh bawk. Bruno Fernandes pawhin hliam tenau nei mah se Portugal squad-ah a la awm chhunzawm thung.
Hetih lai hian, Arsenal captain hlui leh Senegal head coach thar Patrick Vieira chuan Manchester United manager hlui Sir Alex Ferguson-a nen inbiakna thuruk an lo nei tawh a ni tih a sawi chhuak a, hei hian Old Trafford chanchinah titi a titam hle.
Sky Sports an kawmnaah Vieira chuan, "Manchester United panna hunṭha ka lo nei tawh a ni. Sir Alex Ferguson-a nen inbiakna kan nei a. Zahna zawng zawng nen, Premier League-a mi pawimawh tak a nih avangin inhmukhawm tura a sawmna kha hnar rual a ni lo," tiin a sawi.
Vieira chuan sawi chhunzawmin, "Kan inhmukhawm a, inbiakna kan nei a, Manchester United tana a ruahmanna leh team din a duh dan te min hrilh a ni. Roy Keane nena midfield-a kan inkawp tura min duhnate, mual veilam sirah Ryan Giggs, dinglamah David Beckham leh Ruud van Nistelrooy hnungah Paul Scholes te khelhtir a tum dan min hrilh a, overall thlirin team chhia a tling lo hle," a ti.
Mahse, Arsenal-a a hlim em avangin chhuahsan a thei lo tih Vieira chuan a sawichhuak a. "Arsenal ka chhuahsan thei tlat lo, hetah hian ka hlim em em a, club tana thil ropui tak din chhoh mek lai a ni bawk nen. Club, player-te leh fan-te hmangaihna ka dawng ṭha em em a. Player anga ka ṭhanlenna tur leh ka thiltumte hlawhtling turin engkim a awm vek a ni," tiin a sawi bawk.
Chutih rualin, United academy player kum 15 mi rawlthar JJ Gabriel chungchangah chanchin thar a awm leh ta bawk. September thla tir khan Gabriel hian a Instagram profile-a a post zawng zawng a padam (wipe) vek a, hemi hnu lawk hian club chhuahsan a duh thu a tarlang zui a ni.
Gabriel hian October 6-ah kum 16 a tling dawn chauh a, chuvang chuan scholarship emaw professional contract emaw pawh a la ziak thei rih lo a ni. United hian a registration tihtawpsak (cancel) an hnawlsak reng a, mahse kum 16 a tlin hunah erawh chuan European club dang—Barcelona leh Real Madrid-te pawh tiamin—zawm thei dinhmunah a ding tawh dawn a ni.
Gabriel-a hian club chhuahsan a tumna rilru hi a thlak leh ta tihna erawh a la ni chiah lo na a, a Instagram profile aṭanga a post a lo padam (archive) ṭhenkhat chu a rawn dah kir (restore) leh ta a ni. Post pahnih a rawn tilang kir leh a: pakhat chu kum 2025 tawp lama Nike nena contract pawtsei a ziah ṭuma a thlalak a ni a, a dang pakhat chu Alan Shearer-a hnen aṭanga 2025/26 Under-18 Premier League Player of the Season Award a dawng lai thlalak a ni.
