Manchester United defender hlui Phil Bardsley chuan rawlthar theihna ngah JJ Gabriel chu Premier League-a khel nghal turin a taksa lamah a la inpeih tawk lo nia a hriat thu a sawi. Senior team-a khelhna hmun a chan tlem avanga Gabriel-a'n Old Trafford chhuahsan a duh nia sawi a awm mek laiin, he Scotland international hlui hian hetiang hian a ngaihdan a phawrh chhuak a ni.
Gabriel hi Thawhlehni liam ta khan kum 16 a tling ve chiah a, tun season hi English top flight-a a inlan theih ṭanna hmasa ber a ni bawk. Nipui laia pre-season match-ah te United first team tan hian inlan tawh mah se, Champions League squad-ah erawh telh a ni lo a, tun thlengin inelna tak takah (competitive match) senior team tan a la inlan lo a ni.
September thla khan he rawlthar hian hmun danga insawn a duh nia chanchin a darh hnuin, Europe-a club lian tam tak beng a verh nghal hle a. United lamin first team kawng an sialsak tawh nia a lan laiin, manager hlui Ruben Amorim leh tuna an enkawltu Michael Carrick-a te hnuaiah first-team training pawh a zawm reng ṭhin a ni.
Gabriel-a aiawhtute chuan October ni 25-a Bournemouth an hmachhawn hun hi league match hmasa ber a khelhna tur (debut) atan an lo beisei deuh nia tarlan a ni a. Mahse talkSPORT hnenah Bardsley chuan kum 16 mi hi taksa lamah a la inpeih lo niin a sawi ve thung. Kum 18 a nih laia United tana debut siamtu fullback hlui Bardsley chuan, "Pawn lam aṭanga thlirin, hetiang level sanga lut tur hian a taksa lamah a la inpeih tawk lo niin ka hria," a ti.
Bardsley chuan sawi zawmin, "Kum liam ta lama player taksa puitling hma tak takte kha i thlir thei ang. Entirnan Wayne Rooney te ang kha chu hetiang kum an nih lai hian khel nghal thei turin an inpeih sa thlap a ni. He naupang theihna hi chu a lang chiang hle a, talent ropui tak a nei a, nakinah player ropui tak a la nih ngei pawh ka beisei. Mahse tun dinhmuna club boruak kal mekah leh chanchin a rawn chhuah dan hi a hun lo deuh a ni. Agent te leh a nu leh pate nawrna vanga hetiang thil hi thleng a nih ka ring tlat; puitling football-a i luhchhoh dawn lai leh kum naupang tak i la nih lai chuan dawhtheihna neih a ngai a ni," tiin a sawi.
Bardsley hi naupang te a nih laiin United tan a inlan ṭan a, club tan senior match 18 a khel hman a ni. Gabriel-a chungchangah hian United boss Carrick pawhin fimkhur a ṭul zia a lo sawi tawh bawk a, international break hma khan Carrick chuan a kum la naupan zia chu football khawvel hriattir a ngaih thu a lo tarlang tawh a ni.
Carrick chuan, "Ka lo sawi tawh kha ka sawi nawn leh ang e... ani hi naupang te a la ni a, mipui hriata thil tam tak vawrh chhuah loh hi a pawimawh a, a chanchin sawi zui leh endik a tawh nasat lutuk loh nan kan fimkhur a ngai a ni. Amah hi kan ngaihtuah a ngai a, finna hmanga chet lak a ṭul bawk. He dinhmun hi amah zawngin a la inrem chho mai ang," tiin a sawi a ni.
Khelmual lamah chuan United hi kar tawp hian an che chhuak leh dawn a, mahni mual Old Trafford-ah Tottenham Hotspur an mikhual ang. Carrick-a naute hian tun season Premier League-ah an chak vawihnihna zawn an tum dawn a ni, an league match hnuhnung pathum aṭangin point hnih chiah an hlawhchhuak a ni.
