Manchester United defender ropui Rio Ferdinand chuan a khelhpui ṭhin Roy Keane chu a fak hle a, Premier League chhung zawng zawngah pawh Keane-a anga inkhel pumpui thunun hneh thei player dang a la hmuh ngai loh thu a sawi chhuak.
Kum 47 mi Ferdinand hi kum 2002 khan Old Trafford-ah a lut a, a hun laia defender ropui ber zinga mi niin, a career chhungin British transfer record vawi hnih ngawt a siam hial a ni. United-a a luh tirh hian Keane chu a hun tawp lam a hmang mek tawh a, mahse he Irish midfielder ropui tak hian khelmual chhung leh pawna nghawng a neih nasat zia chu a mit ngeiin a hmu hman a ni.
Keane hi Sir Alex Ferguson-a enkawlna hnuaia United captain ropui berte zinga mi niin, box-to-box midfielder thawkrim leh theihna sang tak nei a ni a. Kum 1998-99 treble winning season ropui takah pawh khan United tlar lailia tha chak ber a lo ni tawh bawk. Mahse kum 2005 khan manager Ferguson nen an inkar a chhiat zui tak avangin Old Trafford aṭang hian a chhuak ta a nih kha.
Podcast pakhata Ferdinand-a thawhpuiin Real Madrid star Jude Bellingham chu Keane aia team-ah a thlan hmasak zawk tur thu a sawi hnuah, Ferdinand hi a ngaihdan a ṭawngchhuahpui ta a ni. A podcast 'Rio Ferdinand Presents'-ah heti hian a sawi:
"Premier League-ah match tam tak ka khel ve tawh a, mahse mipa pakhatin inkhel pumpui thunun a, khelmuala player dang 21 awmte - khualmual leh mahni mual team zawng zawng - a duh dana a khal kual vel hi ka la hmu ngai lo. An vai mai khan a thunun vek ṭhin a ni. Hetiang reng renga thil thleng hi ka la hmu ngai lo hrim hrim. Hrethiam tur khawpin Roy Keane-a khel i en tawk lo a nih chu," tiin a sawi.
Ferdinand hian Old Trafford-a a awm chhung khan England tana a khelhpui Michael Carrick leh Paul Scholes te telin midfielder ropui tak tak a khelhpui nual a. Mahse, club leh ram tana a khelhpui tawh zawng zawng zingah Roy Keane chu chungnung ber a nih thu a sawi nghet tlat a ni.
"Manchester United-in midfielder an neih tawh zawng zawng zinga ṭha ber chu Roy Keane hi a ni," tiin Ferdinand chuan a sawi belh bawk.
Kum 55 mi Keane hian kum 2005-a United a chhuahsan hnu khan Scottish club Celtic-ah hun reilote hmangin kum 2006 khan football a chawlhsan ta a ni. Old Trafford-a a hun hman chhung ropui takah khan Keane hian Premier League title vawi sarih (7), Champions League nomawi vawi khat leh FA Cup vawi li (4) lai a chawipui hman a ni.
