Manchester United boss Michael Carrick chuan Old Trafford-a he hna chelh chhunzawm tlak a nih zia pholang tura a beih mek laiin, kar khirh leh hahthlak tak a hmang mek a ni. Match nga ngawt an zawnin an chak tawh lo a, hemi siamṭhat a ngaih bakah Lisandro Martinez-a thinrim au chhuak boruak leh hliam vanga inhliam zozai te chuan a ti buai zual hle.
Tun kar tawpa United leh Leeds United inhmachhawn turah hian a vaiin player 10 ngawt an inlan thei lo maithei a, heng zinga pasarih lai hi United player vek an ni nghe nghe. Khelmual hmun ṭhenkhatah phei chuan Carrick-a tan duhthlan tur a vang hle tawh a ni.
Elland Road-a an zinna turah hian Carrick chuan Luke Shaw leh Kobbie Mainoo te an inlan thei dawn em tih ngaihvenin a nghak mek a. Atletico Madrid an hmachhawn ṭum pawh khan Diogo Dalot chu left-back-ah a khelh a ngai a, mual lehlam sirah naupang Ayden Heaven chu chhawr a ngai bawk a ni.
Patrick Dorgu chu kar eng emaw zat a la chawlh dawn laiin, Noussair Mazraoui erawh a rawn kir leh ṭep tawh thung. Morocco international hi kar tawpah squad-ah a tel theih mai a rinawm a, mahse a khel ngei ang em tih erawh a la chiang lo. Hemi chungchangah hian Carrick chuan, "Nous hi kan kiangah a rawn tel leh theih ngei kan beisei. Training tlem a nei tawh a, group-ah a rawn awm leh dawn a, hei hi kan tana penkhat hmasawnna ṭha tak a ni," tiin a sawi.
Striker nghet (out-and-out striker) nei lovin United hi kar khat dang an awm leh a ngai dawn a, Leeds hmachhawn tur hian Benjamin Sesko a la inpeih lo bawk. Engtikah nge a rawn kir theih ang tih pawh puan thuai beisei a ni.
Carrick chuan, "Timelines kan update hmain Ben hian endikna tlem a la paltlang mek a ni. A dinhmun hi a chiang thei ang bera hriat kan tum mek. Inkhel tur chuan a la hla deuh hlek a, mahse kan chian hunah kan hrilh vat ang che u," a ti bawk. Heng bakah hian hun rei tak chawl tawh Manuel Ugarte leh goalkeeper Tom Heaton te pawh Carrick hian a chhawr thei rih lo a ni.
Leeds manager Daniel Farke erawh chuan United ang em emin hliam buaina a nei lian lo thung. Mahse Leeds boss hian United player hlui Dan James-a dinhmun a ngaihven ve hle a ni. James-a chungchang sawiin Farke chuan, "A hnungzang na vang khan ni 10 vel zet a chawl a, a ram national team tan pawh an match hnuhnung ber a khel thei lo a nih kha. Mahse nimin aṭang khan kan kiangah khelmualah a rawn training leh tawh a ni. Tun dinhmunah chuan a taksain engtin nge a dawn sawng tih kan nghah a ngai rih. Mahse a chanchin lawmawm tak chu, a ziaawm chho hle niin a lang," a ti.
Leeds hian defender Joe Rodon an chhawr thei dawn lo bawk a, kar 10 chhung chawl tura ngaih a nih hnuah tunah hian dam chhoh lam a pan mek a ni. Farke chuan, "Joe hian he match hi a la khel thei dawn lo. A hliam tirh khan kar 8 aṭanga 10 chhung a chawlh tur thu kan sawi a, tunah hian kar sarihna kan thleng tawh a, a lo kir a hnai tawh hle. A inenkawlna kawngah hma a sawn ṭha a, team training-a a rawn tel theih nan hun a duh rei tawh lo ang," tiin a sawifiah a ni. Hemi bakah hian Mateo Joseph pawh a khup hliam (ACL) aṭanga a la damchian loh avangin a la chawl rih bawk a ni.
