Manchester United legend Wayne Rooney-a fapa Kai Rooney-a'n United Under-21 tana a debut game a khelh hmasak ber chu vanduaina leh beidawnnain a khung ta.

Zirtawpnia Loughborough University Stadium-a Premier League 2 match khelhah, kum 16 mi he rawlthar hi second-half-ah a rawn inlan a, Nottingham Forest lakah United hi 3-2 in an tlawm a ni.

Minute 78-naa match hi 2-2 a an inhnehtawk laiin Kai Rooney-a hi khelmualah a rawn lut a. Manchester United Under-21 tan hian goal khungin danglamna rawn thlen a beisei hle a, mahse thil a kal sual ta thung. Forest tan Shakur Samuels-a'n hun tawp dawnah chakna goal pawimawh a khung tak avangin United hi an tlawm ta zawk a ni.

Hei hi tun season Premier League 2-a United Under-21 tlawm vawikhatna a ni a. An match hmasa pathumah Ipswich Town, Leicester City leh Brentford te hnehin goal 12 ngawt an khung a, goal 3 chiah an chhuah thung a ni.

Forest an hmachhawn hmain Kai Rooney-a hian social media (Instagram) lamah U21 tana khelh a phur zia a lo tarlang tawh a, dressing room-a a jersey khai lai thlalak ziakin "U21s vs Forest" tiin a post a ni. He U21 debut a siam hmain, kar khat pawh a la tlin lohvin UEFA Youth League-ah Madrid khawpuiah Atletico Madrid lakah United Under-19 tan a lo inlan tawh a, he match-ah hian United hi 3-0 in an lo tlawm bawk a ni.

Season liam taa United Under-16 tana che ṭha tak Kai Rooney hi club youth system aṭanga chhawm chhoh zel niin, July thla khan United nen kum hnih daih scholarship agreement (full-time apprenticeship) an ziak a. He contract hi kum hnih hnuah kum thum daih professional contract-ah a inthlak chho dawn nia hriat a ni a, kum khatah £50,000 vel hlawhin signing-on fee an pe tel bawk ang. Tun dinhmunah Old Trafford academy-a rawlthar theihna ngah berte zinga mi a ni.

Kum 2002 khan kum 16 mi chauh la niin Everton aṭangin Premier League debut a lo siam tawh, a pa Wayne Rooney chuan a fapa theihna chungchang hi a lo sawi tawh a ni.

Manchester United-a a khelhpui ṭhin Gary Neville-a show 'The Overlap'-ah Rooney chuan, "Ka pianhmang vel chu a chhun a, mahse kei aiin a sang zawk dawn a ni. Goal khung thiam a ni a, box chhungah a tal ṭhin a, chance a rim hnam zung zung ṭhin; chu chu a khelh dan phung a ni a, a che ṭha hle a ni," tiin a sawi.

Neville-a'n a fapa hi a hlawhtling thei ang em tia a zawhna chu chhangin Rooney chuan, "Ka tan chuan a la hma lutuk a, engmah hriat a la ni lo. Mahse theihna ngah tak a ni tih a tilang a, entirna ṭha tak tak a phochhuak mek a ni," tiin a sawi bawk.