Manchester City chuan kum 2009 leh 2018 inkar khan Premier League financial rule vawi 114 ngawt an bawhchhia tiha hmuh chhuah an nih avangin, he mi chhunga an nomawi lak tawhte hlihsak an nih theihna chungchanga sawi a hlawh hle. A bikin 2012 leh 2018 season-ah te khan Manchester United chu pahnihna an ni a. City hremna tur hi puangzar a la ni lo a, an ni lamin thutlukna hi appeal hmangin an khing let mek a ni.
A hmaa inkhel ṭhin player-te zingah he thil hi ngaihdan a inthlau hle. Ṭhenkhat chuan hmanah khelmualah an lo tlawm tawh zawk mah se, thudik zawnchhuah a nih hnuah medal dawn leh chu thil awm tak a ni tiin an ngai a, ṭhenkhat erawh chuan khelmuala lo hlawhchhuah ni si loha medal lak chu an duh lo thung.
Old Trafford legend mi 6 te ngaihdan hi i lo en ang ziang:
Paul Pogba: Pogba hi Manchester United-a a awm chhungin vawi hnih ngawt Pep Guardiola-a team Manchester City dawtah pahnihna an ni a. 2017-18 season-a an pahnihna dinhmun kha City-in dan an bawhchhiat hun chhungah a tel a ni. Pogba chuan, "Premier League-ah hian nghawng ṭha lo a neih loh ka beisei a. League title pahnih kan neih belh theih ngei ka beisei," tiin a sawi.
Paul Scholes: Kum 2011-12 season-a Manchester City-in an Premier League title hmasaber an lak ṭum khan, Paul Scholes hi chawlh a lak hnuah a rawn kir leh a ni. Scholes-a'n Premier League medal 11 a lo chawi tawh a, medal a la duh thu hi fiamthu leh thutak deuh hlek hian social media-ah a ziak chhuak a. "Ka teammate hluite'n nomawi hlihsak an duh rualin medal atan an duh lo tih ka hria... keizawng ka duhthawh a, ka medal tur ka duh e," tiin a ziak a ni.
Rio Ferdinand: Premier League nomawi vawi nga chawi tawhtu Rio Ferdinand pawhin medal hi lak a hreh lo hle. Joleon Lescott-a hnen aṭanga medal laksak tur anga sawiin, "Joleon-a ka hmuh hunah a inah va kalin, 'Ngun takin ngaithla rawh, rawn hlan vat rawh,' ka va ti ang. Champion kan ni tiin an sawi ngam bik tawh lo ang. City hi hremna sum chawitir mai lovin, an nomawi leh medal te hi min hlan zawk tur a ni," tiin fiamthu titak deuh hian a sawi.
Wayne Rooney: United-a goal khung hnem ber Wayne Rooney erawh chuan 2011-12 season-ah khan league match-ah goal 27 ngawt khung mah se, khelmual aṭanga lak a nih loh avangin medal dawn chu a tum lo bur. Rooney chuan, "Player-te dinhmun aṭangin ka thlir a ni. Player-te khan thil thleng an hre lo a, khelmualah lutin champion an ni a, keini chu pahnihna kan ni. Keini chu pakhatna kan ni lo va, eng chhan vangin nge pahnihna nih avanga medal chu kan duh anga?" tiin a sawi.
Michael Owen: Kum 2010-11 season-a United tana Premier League medal pakhat chauh chawitu Michael Owen pawhin hetianga medal dawn hi nuam a ti lo. Owen chuan, "Thil thleng ta se medal pakhat ka dawng belh ngei ang, mahse nuam ka ti chuang ka ring lo. Football chu khelmuala hriatrengna leh boruak nuam tak te kha a ni a, kum 10 emaw 20 emaw hnuah medal an rawn hlan che kha a ni lo. Ka rilruah chuan ka lak tawh chin kha ka la a ni mai a, a bak atan ka buai lo," a ti.
Michael Carrick: United head coach Michael Carrick pawhin Owen-a rilru chu a ṭawmpui hle. Carrick-a khelh lai khan 2011 leh 2018-ah te City dawtah pahnihna an lo ni tawh a ni. Carrick chuan, "Thutlukna a la chhuah loh avangin ka la nghak rih a ni. Mahse, eng infiamnaah pawh nise, hun rei tak hnua medal i hmuh hian a tir aṭanga champion-na phurna leh hlimna kha a rawn thlen pha tak tak tawh ngai lo," tiin a sawi bawk.
