Head coach Michael Carrick-a hnuaiah Manchester United chuan an tlarhma (attack) thuam chak tumin theih tawp an chhuah mek a, Bayer Leverkusen playmaker theihna ngah tak Ibrahim Maza chu an lak luh tum ber zinga mi a ni chho mek. Mahse, he playmaker theihna nei ṭha tak lakluh tumna kawngah hian United hian an elpui lian tak takte an hmachhawn a ngai dawn a, inremna puitling nei tura an beihna hi a awlsam dawn lo hle.

Michael Carrick-a enkawlna hnuaiah tun season chhung hian Manchester United tlarhnung (defence) chu beisei an phak lo fo va, Carrick-a tan pawh beidawnna lian tak an thlen tawh ṭhin a ni. Mahse, tlarhnung lamin duhthu an sam loh rual hian, an tlarhma (attack) lam pawh demna leh sawiselna lakah an fihlim bik hauh lo thung. An tlarhma lamin hun pawimawhah theihna an phochhuak tawk lo ṭhin a, goal khung theihna kawng an dap chhuah zawh loh fo avangin United hian harsatna lian tham an tawk chho fo reng a ni.

He harsatna hi an elpui Manchester City nena an inhmachhawn ṭum pawh khan a lang chiang hle a ni. Kha inkhelah khan City lamin red card chawiin minute 75 chuang zet khelmualah mi 10 chauhvin an khel a, mahse khati chung pawh khan United front four (tlarhma mi pali) te chuan City tlarhnung chu an sut tlang thei tlat lo a nih kha. Khingpui lamin mi tlem zawk nena khelmual an awm chung pawha minute 75 chhung tehmeuh kawng zawng hmu zo lova an tlarhma an talbuai zui mai kha Carrick-a naute tana thil mualpho thlak tak a ni a, tlarhma lama danglamna thlen thei tur player thar an mamawh zia tarlangtu chiang tak a ni bawk.

Chuvang chuan Leverkusen playmaker Ibrahim Maza hi Michael Carrick-a ruahmanna atan player ṭangkai tak leh United attack thlak danglam dawrh theitu tura ngaih a ni a. Khelmuala khingpuite tlarhnung pawt darh thei tur leh, tlarhma mite tana chance ṭha tak tak siamsak thei playmaker thluak ṭha a nihna hian Old Trafford lam mit a la ta hle a ni. Chutih rualin, hetiang theihna nei ṭha player hi club dang, an elpui ber berte pawhin an chuhpui ve tlat avangin transfer bazar-ah hian United hian beihpui an thlak a ngai dawn ta a ni.