Zirtawpni zan khan Leigh Sports Village-ah Manchester United U21 chuan Brentford U21 an lo mikhual a, inkhel hmuhnawm leh boruak sang tak hnuah 3-2 a hnehna changin Premier League 2-ah 100% record an la vawng nung zel a ni.
Adam Lawrence-a naute hian rawlthar lar tak JJ Gabriel chu an chhawr thei lo va, Gabriel hian United chhuahsan a thlan tak avangin Barcelona nena inbiakna nei turin Spain ram a pan mek niin report a ni. Amaherawhchu, Nilainia first-team match-a bench aṭanga inlan lo Harry Amass leh Tyler Fletcher te chuan U21 squad hi an rawn fin ve thung a, an team tan an thawhhlawk hle bawk.
Tun season-a academy team-te tih dan ṭhin pangngaiin, United naupangte hian inkhelh ṭan tirh aṭangin ball an thunun hneh nghal hle a. Brentford tlarhnung a phui ṭhat em avangin United hian hmun awl an hmu hleithei mai lo va, minute 18-naah Tyler Fletcher-a'n a unaupa Jack Fletcher chu box chhungah hmuin chance hmasa ber an nei a, Jack-a ball pet chu Brentford keeper-in a lo dansak a ni.
Inkhelh kalphung nena inpersan takin minute 30 hma hretin Brentford-in goal an khung hmasa ta tlat mai. Mual dinglam sir aṭanga Brentford ball vawrh luh chu la thlain, Isaac Holland chuan Albert Mills-a lak aṭanga a tlanchhuah hnuah awlsam takin goal-ah a chantir a ni. Hemi hnu minute 30-naah season thara a vawikhat nan inlan Samuel Lusale chu a khup tihhliam avangin lakchhuah a ngai nghal a, a aia lut Bendito Mantato chu box sir velah tlan lut ngun hle mah se referee-in foul a pe duh lo thung.
First-half stoppage time-ah United-in an siphurh an rawn sut ta nge nge a. Harry Amass-a bul ṭan counter attack ṭha zet chu Yuel Helafu chuan chak takin a nawr chho a, box chhungah Amir Ibragimov a pe a, yard 16 vel aṭangin Ibragimov hian kil sirah mawi takin a pet lut a, 1-1 in chawlhlawk an hmang ta a ni.
Second half-ah pawh United bawk chu chungnung zawkah ṭangin nawr zui reng mah se, Brentford defence an su tlang hleithei meuh lo. Mahse minute 63-naah vanneihna an tawng a, Helafu-a ball shot chu defender per kawiin keeper liamin goal-ah a lut a, 2-1 in United-in hma an hruai ta a ni. Brentford an la zam chuang lo va, Holland chuan United defender Dan Armer-a hnunglam aṭanga chhuhin goal ban a pet per zui bawk.
Minute 76-naah Jack Fletcher-a pass aṭangin Victor Musa chuan first-time shot mawi tak hmangin United goal thumna a khung a, mahse he goal luh dawn hian referee-in midfield-a Brentford player a lo dal palh avangin buaina tlem a chhuak nghe nghe. Brentford thinrimin an rawn nawr let nghal a, United defender te tlan chak tawk loh chu hmang ṭangkaiin goal hlauhawm siam mah se United goalkeeper Cameron Byrne-Hughes chuan ṭha takin a lo dang a ni.
Hun tawp dawn hnaihah Jack Fletcher chuan midfield-ah ball hloh hlauhin, chu chu Brentford lamin rang takin an rawn bawhzui a, Holland chuan a goal hnihna khungin 3-2 a ni ta a. Mahse Brentford tan hun a tlai tawh em avangin United chuan an hmahruaina humhimin point 3 hlu tak an hlawhchhuak ta a ni.
Match thum khelha vawi thum chak vek United hi Premier League 2-ah 100% record la kawl thei club awmchhun an ni a; match khat khelh tlem zawk neiin hmahruaitu Southampton dawtah pahnihna dinhmun an luah mek a ni.
