Manchester United rawlthar theihna ngah JJ Gabriel chu Old Trafford-a hun remchang a neih mek chu hlut thiam tur leh hmanhmawh lova a hun nghak hram hram turin fuih a ni.
Tun kar chhung khan Gabriel-a aiawhtuten Manchester United chhuahsan an tum thu an thlen hnuah, he rawlthar kum 15 mi hmabak chungchang hian United huang chhungah sawi a hlawh chho hle a ni. Chhuah a tum thu a darh takah hian Spanish club lian Real Madrid leh Barcelona te nen sawizawm nghal a ni a. Kar laiah khan Manchester United tana a senior debut match khelh theihna hun remchang a nei nghe nghe a, inlan sela chuan club chanchina player naupang ber ni thei dinhmunah a ding a, mahse he hunṭha hi a bawhpelh ta thung a ni.
United youth prospect hlui Devonte Redmond chuan Gabriel-a aiawhtute chu dawhtheihna tlachham leh, Manchester United-a hun remchang a neih mek chu hlut thiam lo tiin a sawisel a. Gabriel-a chungchanga buaina chhuak mek hi chinfel tumin United lam chuan inbiakna an la kalpui reng a ni. Kumin nipui pre-season chhung khan club tan a lo inlan tawh a, first team lam panin hma a sawn chho hle a nih kha.
'More Than A Match' nena an inkawmnaah Redmond chuan Gabriel chu thui tak thlir thiam tur leh, United-ah hian a hun nghak hram hram turin a chah a ni.
Redmond chuan, "Kum 15 chauh a la ni a. Football khawvelah hian kum 20 dang daih hun a la nei a ni. A hun a nghah thiam a ngai a, a pa pawh hian hei hi a hriat thiam a ngaiin ka hria. Hetianga boruak siam chiam hian buaina chauh a chawkchhuak dawn a, a tawpah tu tan mah thil ṭha a thlen dawn lo a ni.
"Barcelona emaw Madrid emaw pawh zawm se a pawi lo; mahse United-ah hian bul ṭanna tur hmun ṭha tak a nei reng a ni. Brighton an hmachhawn ṭum pawh khan squad-ah a tel dawn chiang tih ka hria. Kum 15 mi lek ni chunga United senior squad-a tel theih chu thil lian tham tak a ni tih kan theihnghilh a ni," tiin a sawi.
A sawi zawmnaah Redmond chuan, "A awmna hmun dik takah a awm a, coach ṭha tak takin an hualvel bawk a ni. Tlem chuan hnungtawlh deuh hlek a, inbengdaih a ngai a ni. Manchester United an nih hi theihnghilh loh tur a ni a. First team luh nan hian kum hnih dang nghah a ngai a nih pawhin, kum 17 chauh a la ni dawn tho asin," tiin he rawlthar hi thurawn a pe zui bawk.
United lamin chelh tumin theih tawp chhuah mah se, Gabriel-a dinhmun hi thutlukna siam danglam hman tawh loh khawpa a kal thui tawh an hlauthawng hle a ni. Real Madrid chu he rawlthar lakluh tumtu langsar ber an ni a, mahse Madrid-ah hian first team-a inzeh luh chu a tan a harsa lehzual maithei thung. Madrid ruahmanna hmasa berah chuan Gabriel hi an B team, Real Madrid Castilla lama khelhtir phawt an tum nia hriat a ni.
United head coach Michael Carrick erawh chuan Gabriel-a chungchang hi sawi thui duh lovin, chipchiar taka thil sawi chhuah chu a hnawl thung a ni.
