Manchester United player ṭhenkhat chuan Amazon-in 'All or Nothing' documentary an siam meka camera awm ve reng chuan inkhelh zawha dressing room chhung inbiakrawnna (post-match debriefs) ah zalen leh tlang taka thu sawi a ti-harsa nia an ngaih thu The Peoples Person kaltlangin The Sun chuan a tarlang.
United-in tun season bul an ṭan chhiat em em chhanah hian player leh staff-te inkara inbiakpawhna a fel tawk loh vang nia rinhlelhna a awm laiin, video lakna camera awm hian khelmuala an result chhiat phah tak tak em tih erawh fiahna chiangkuang a awm lo thung.
Tun season chhung hian Amazon Prime-a 'All or Nothing' series siamtute hian United hi an zui chawt reng a. The Sun report tarlan dan chuan, match zawha an khelh dan thlirletna an neih ṭhinah hian camera a awm ve zel avangin player leh staff-te chuan an rilrua awm dik tak sawi chhuak ngam lovin an inthup phah ṭhin niin an sawi a ni.
Hetianga camera hmaa an awm reng hian khawi laiah nge an tihsual a, eng nge an siamṭhat ngai tih tlang taka inhrilh tawn chu a ti-khirh phah hle niin an hria a ni. Mahse The Peoples Person chuan he thil hi team boruak tichhe theitu a nih theih rualin, camera awm vanga khelmuala khel chhe ta zawk anga official-a ngaih erawh a la theih loh tih a tarlang tel a ni.
He thuthang hi United-in khelmual lama hun harsa tak an paltlang mek laia rawn chhuak a ni a. Season liam ta khan Premier League-ah pathumna an ni a, tun season-ah pawh nomawi lian tham inchuh thei tura beisei an nih laiin, tun season league match ruk (6) an khelh tawhah 14-na dinhmunah an tla thla a, Carabao Cup aṭang pawhin an tla fel der tawh a ni.
Head coach Michael Carrick chu team-in tha an thawh tawk loh leh an ṭhahnemngaihna a tlem avangin sawisel a tawk mek a, chutih rualin director of football Jason Wilcox pawh transfer window inhawn lai khan squad-a hmun derthawngte a thuamchak ṭhat tawk loh avangin sawiselna a tawk bawk. Heng thilte hi camera lakna nen inzawmna a nei hran lova, mahse squad chhungrila inpumkhatna leh inremna chungchangah zawhna a siam nasa hle a ni.
The Peoples Person chuan Champions League-a Atletico Madrid laka an tlawm hnu khan, Lisandro Martinez-a'n transfer bazara Wilcox-a hmalak dan a sawisel kha dressing room chhung boruak ti sa zualtu a nih theih thu a tarlang bawk a, a rukin eng thu chiah nge inhrilh erawh hriat a ni lo.
Match result a ṭhat chhoh vat loh chuan Carrick-a tan hian pressure a sang chho zel dawn a, hei hian documentary siamtute tan chuan chanchin ngaihnawm lam a thlen zawk maithei a ni. Tun dinhmunah erawh chuan player ṭhenkhat ten camera vanga inbiak tlang a harsa an tih thu chauh hi sawi theih awmchhun a la ni rih a ni.
