Manchester United pumhlum lei tuma a fapain hma a lo lak aṭanga kum thum a liam hnuah, Sheikh Jassim-a chhungte chuan European football huangah investment lian tham tak siam tumin ke an pen leh ṭan nia hriat a ni. Hamad bin Jassim bin Jaber Al Thani-a chhungkaw sum enkawltu 'Al Mirqab family office' chuan Italian club lian Inter Milan-ah share tlem zawk (minority stake) lei theih dan kawng an dap mek nia tarlan a ni a, he thil chungchangah hian club lam pawh an be pawp tawh a ni.
Report hrang hrang tarlan danin, he Qatar chhungkaw mihausa hian Inter Milan hotute chu tlang takin an be pawp tawh a, club-a sum thehchhuah theih dan tur an sawipui ṭan a ni. He inbiakna hi a thuphunga inbiakna (verbal contact) la ni rihin, club chhungah minority stake neih theih dan tur an ngaihven mek tih tarlan a ni. Al Mirqab family office hian khawvel hmun hrang hrangah sum tam tak an lo peipung tawh ṭhin a, tunah hian Europe khawmualpuia football club ropui berte zinga mi Inter Milan chu sum thehchhuahna tur hmun atan an melh chho ta a ni.
He chhungkua hi football khawvelah chuan hming thar an ni lo hle mai. Kum thum liam ta khan, Hamad bin Jassim-a fapa Sheikh Jassim bin Hamad Al Thani chuan English Premier League club lian Manchester United chu a pumhluma lei tumin hma a lo la tawh a nih kha. Khami ṭum khan khawvel mipui leh United fan-te ngaihven hlawh khawpin Glazer chhungkua chu a dawr a, Old Trafford club pumpui lei a, a leiba zawng zawng rulh fai vek a tiam hial a ni. Mahse, inremna puitling erawh an siam thei ta lo a, United takeover saga rei tak a kal hnuah an inhnukdawk ta zawk a nih kha.
Chutiang boruak a liam hnuah, tunah hian an chhungkaw sum enkawlna Al Mirqab kaltlangin Italian football-ah inrawlh theihna remchang an zawng ve leh ta thung a ni. Inter Milan hi Serie A title lo chawi tawh leh Champions League final thleng thei khawpa club ropui an nih avangin, sum peipungtute mit la thei tak an ni reng a. He Qatar chhungkaw hmalakna hian engtiang takin nge hma a sawn chhoh zel dawn tih leh, Inter Milan nen hian inremna puitling an nei thei dawn em tih chu hunin a la hril chho zel ang.
