Bournemouth midfielder Alex Scott-a chungchangah Manchester United chuan nakkum lama a man zat tur chungchang hriatpuina an dawng a, Cherries lam hian nakinah kum 23 mi man atan hian sum tam tak an chhiar dawn niin a lang.

Kumin nipui transfer window chhung khan Red Devils hi Scott-a lakluh tura sawizawm an lo ni tawh a, Premier League club dang eng emaw zat pawhin he English midfielder theihna nei ṭha tak hi an lo ngaihven ve bawk a ni.

Liverpool leh Chelsea pawh Scott-a lalut thei dinhmun tura ngaih zinga chhiar tel an ni a. Ani hi Thomas Tuchel-a enkawl England squad-ah pawh World Cup hmaa training camp neihnaah koh a lo ni tawh hial a ni. Kumin nipui bazar a khar meuh kha chuan Scott hian Bournemouth hi a chhuahsan ta lo va, mahse nakin zelah - January transfer thlasik lai emaw nakkum nipuiah emaw club a la chhuahsan tho ang tih rin thu sawi a la awm zui reng a ni.

The Athletic journalist rintlak David Ornstein-a tarlan danin, Bournemouth hian he midfielder naupang tak lakah hian dinhmun khauh tak an nei a, a chhuah phalna man tur pawh an bithliah sang hle. Report-in a tarlan dan chuan, nakkum nipuiah Scott hi hralh an remti a nih pawhin Cherries hian a tlem berah £100million ngawt an phut a beiseiawm a ni. Amaherawhchu, Liverpool leh amah dawrtu dangte'n a hminga an thehchhuah ngai tur zat chiah hi chu tarlan chian a la ni rih lo thung.

Ornstein-a'n a tarlan zel danin, Bournemouth hian kumin nipui laia ngaihven hlawh ve tho Rayan leh Eli Junior Kroupi te lakah pawh hetiang chiah hian dinhmun khauh an la tlat bawk. Rayan hian a contract-ah chhuah theihna man (release clause) £130million lai nei mah se, he clause hi kum 2027 nipui thleng chu a nung dawn lo a ni.

Manchester United tan erawh kumin nipui transfer bazar chu tlar laili thawmṭhat kawngah an buai hle a, an player lak thar pali zinga pathum ngawt chu tlar laili player an ni. Head coach Michael Carrick-a squad thuam chak tur hian United chuan Chelsea aṭangin Andrey Santos, Aston Villa aṭangin Youri Tielemans leh Brighton aṭangin Carlos Baleba te chu an lo la tawh a ni.

Tun season inṭan chhoh kar hmasate khan Santos leh Tielemans te hian inkhelh hun an chang ṭha nghal hle a. Baleba erawh chuan Old Trafford a zawm hmaa a kerek hliam a tawrh avangin dam ṭhat tumin inenkawlna a la kalpui mek thung a ni.

January transfer window a inhon hunah United hian tlar laili thuam chak belh tura transfer bazar-ah an lut leh dawn nge, nakkum nipui thleng nghakin an squad dinhmun an thlir nawn leh phawt dawn tih erawh hunin a la hril ang.