Manchester United defender naupang leh beiseiawm tak Reece Munro chuan a vawikhatna atan ram aiawh tura kohna dawngin, Wales Under-21 squad-ah koh tel a ni ta.

England rama piang ni mah se, Grenada thlah (heritage) nei bawk Munro hian a hma zawngin heng ram football association pahnihte aṭang hian kohna a la dawng ngai lo a ni. Tunah erawh ram inelna chawlhkar (international break) lo thleng tur atana Wales Under-21 squad puan chhuahah a hming a lang ve ta a ni.

Kum 19 mi centre-back hian Wales Under-21 team-ah hian a Manchester United khelhpui ṭhin Gabriele Biancheri chu a va fin dawn a, striker Biancheri hian tun hnai mai khan Austrian club Wacker Innsbruck a lo zawm tawh a ni.

Munro-a tana hetianga ram tana kohna hlu tak a dawn theihna hi kum 2026 chhunga a thawhrimna rah a ni a. Hliam na tak avanga khelmual chhuahsana a awm hnuah, theih tawp chhuaha a inenkawl dam let leh hnuah lawmman ṭha tak a dawn theih phah ta a ni.

Tun season kal mekah Manchester United Under-21 match hnih khelh tawhah Munro hi a inlan ve ve tawh a, chung zinga match khatah chuan bul a ṭan nghal bawk. Kum 19 mi defender hian January thla khan vawi thum a inlan hman a, mahse a hnu lawkah hliam na tak tawkin 2025-26 campaign chhung zawng chu inkhel thei lovin a chawlh phah a nih kha. Tunah erawh dam ṭha vawng vawngin a rawn kir leh tawh a, international call-up a hmuh zui tak hian a inbuatsaihna leh thawhrimna a phuhruk hle a ni.

Munro hian United Under-18 team-ah captain dinhmun a lo chelh tawh ṭhin a, 2025 pre-season lai khan first team training-ah pawh a lo tel tawh bawk a ni. Tun dinhmunah hian Under-18 lama a lo enkawltu manager Adam Lawrence-a hnuaiah Under-21 tan a khel chho mek bawk.

Hei bakah hian kum 2025 postseason tour-ah pawh khan tel vein, ASEAN All-Stars lakah khan bench aṭangin a rawn inlan hman a ni. Hliam na tak paltlang hnuah khelmualah a theihna rawn phochhuak chho lehin, hetianga ram tana inlan theihna hun remchang a nei chho ta hi United academy leh ama mimal tan pawh chanchin lawmawm tak a tling a ni.