Manchester United manager hlui legendary Sir Alex Ferguson chuan a lehkhabu thar 'Games of My Life' ah, kum 2013-a a chawlh hmaa Pep Guardiola chu a thlaktu atana a lo hmin zo lo kha a inchhir hle tih a tarlang.

Kum 2012 khan New York khawpuiah Ferguson leh Guardiola te hi an lo inhmu tawh a. Khatih lai khan Ferguson hian chawlh a tum chiang reng tlat a ni tih a la puang lo a, Guardiola pawhin Barcelona-a hlawhtlinna ropui tak a hmachhawn hnuah chawlh lawk (sabbatical) hmangin, Germany club lian Bayern Munich zawm turin a rilru a lo siam fel tawh thung a ni.

A lehkhabu tharah Ferguson chuan he inhmukhawm chungchang hi sawiin, "Kum 10 liam ta chhung khan, 2012-a New York-a Pep nena zanriah kan dun aia thla engemaw zata a hma hian inhmu ta zawk ila chuan engthil nge thleng ang tih ka ngaihtuah fo ṭhin," tiin a ziak.

Ferguson chuan sawi chhunzawmin, "Khatih lai khan chawlh ka tum tak tak a ni tih ka la chiang bik lo a. Pep pawh hian La Liga-a kum li chhung continental treble leh League leh Champions League double te a lak a, hlawhtlinna nasa tak a neih hnuah, Bayern Munich nen Bundesliga-a chona thar hmachhawn a tum tlat thung a ni.

"Hun hi her kir theih nise chuan, chumi hma thla engemaw zatah khan zanriah hi kan dun ang a; Italian uain changkang Tignanello a tam thei ang ber ka thlit sak ang a, a hmakhua chu Manchester-ah a awm a ni tih hmin ka tum hram hram ang. Vanduaithlak takin kan tan thil a tlai hman pawi ta a ni," tiin a tarlang bawk.

Kum 2013-a Sir Alex Ferguson-a'n khelmual a chhuahsan hnu hian Manchester United chuan Premier League nomawi an la chawi leh ta miah lo a. Ferguson chuan a thlaktu turin David Moyes a thlang a, mahse he Scot manager hi rei a chhen lo hle a, a hnu a rawn thlaktute pawh an hlawhtling hlei thei lo a ni. Tunah hian head coach thar Michael Carrick chuan Old Trafford-ah boruak thar rawn thlen a beisei hle.

Guardiola hian Bayern Munich-ah Bundesliga title pathum leh German Cup pahnih a lakpui a, mahse Champions League semi-final bak a thleng zo lo thung. Hemi hnu hian Manchester City a zawm a, City-ah hian kum 10 chhung zet awmin English football-ah a lal ber pawlah a inhlangkai a ni. City hi Premier League financial regulation bawhchhia vawi 114 ngawt hmuhchhuah a nih vangin buaina zinga tling tel mah se, Guardiola-a hming leh a theihna erawh a chuai phah lo a ni.

Ferguson-a'n Guardiola hi a hmain hmin hman ta se chuan Old Trafford chanchin pawh a danglam tawh hle maithei. Mahse United chhungrila Glazer chhungkuaten boruak an siam chhiat chhoh ṭan phei chuan, United-ah Guardiola hian hlawhtlinna a chang ngei ang em tih erawh sawi chian theih a ni bik lo.