Manchester United chuan an academy rawlthar theihna ngah tak JJ Gabriel-a aiawhtuten a inziahluhna (registration) tihtawp an ngen tawh chung pawhin, scholarship contract an chhawpchhuahsak niin chanchinbu hrang hrang chuan an tarlang.
October ni 6 liam taa kum 16 tling chiah Gabriel hian, United aṭanga chhuah phalsak tura a ngen hnu aṭang khan club hmunpui Carrington a la rap leh miah lo a ni. He forward rawlthar hian Spain rama Catalonia bial chhung Castelldefels-ah mimal coach ruaiin kar thum zet mai training a lo nei tawh zawk a ni.
Gabriel hi lakluh tumin Barcelona leh Real Madrid te chuan inbiakna an lo neihpui tawh a, Bayern Munich leh Paris Saint-Germain te pawhin an ngaihven hle bawk. United lamin inbiakrem theih beiseina an lo neih ve ṭhin chu beidawnthlak lamah a chang chho mek a, he rawlthar hian Old Trafford a chhuahsan ngei a rinawm tak avangin dan anga hma lak (legal action) United hian an ngaihtuah mek a ni.
The Guardian-in a tarlan danin, United hian Gabriel-a hnenah hian official takin scholarship contract an chhawp a. Hetianga an tih loh chuan January thlasik transfer window-ah hian Premier League club dangte'n a thlawn (free transfer)-in an lak theih mai an hlauh vang a ni.
Tun dinhmunah chuan England ram chhung club-te'n lakluh an duh a nih pawhin United an dawr a ngai tawh dawn a ni. Academy player ṭha berte zinga mi English club dangte'n an inleisak hian a manah inrem theihna a awm loh chuan, Professional Football Compensation Committee tribunal lamin a man tur an bituk sak ṭhin. United chuan England ram chhung club lakah chuan a tlem berah £3m chuang bakah nakina hralh leh a nih huna za zela 20 (20% sell-on clause) dawn an beisei a ni.
Amaherawhchu, Gabriel hian England ram pawn club a zawm a nih thung chuan, United hian chu aia tlem fê chauh chu an hmu dawn a. Category I academy puala FIFA-in compensation a bituk dan tlangpui ang chuan United hian £350,000 vel chauh an hmu dawn a ni. United Kingdom chu European Union (EU) aṭanga an chhuah tak avangin, England ram player-te hi kum 18 an tlin hma chuan ram pawn club-a insawn phalsak an ni lo tlangpui a.
Mahse Gabriel hian EU passport a neih theih phawt chuan ram pawn a pan thei dawn a, tun dinhmunah hetiang lehkha pawimawh fel sa a nei tawh em tih erawh hriat chian a la ni lo. A pa Joe O'Cearuill hi a nu lam aṭanga Ireland mi a nih avangin Republic of Ireland national team tan vawi hnih a lo inlan tawh a, a pa lam aṭangin Trinidadian a ni bawk. Gabriel-a nu hi Cyprus thlah a nih bawk avangin, Ireland emaw Cyprus emaw lam aṭangin EU passport lak theihna kawng pahnih ngawt a nei a ni.
Barcelona sporting director Deco chuan September leh October inkar ram tana chawlh lai khan Gabriel-a chanchin an sawizawm chungchang hi chhangin, "He naupang chungchangah hian sawi tur a awm lo, keini nena player hming an sawizawm hi chu thil thleng fo a ni a. Player la naupang tak pawh nise bazar lian tak a awm reng a ni. A dinhmun ang chiaha awm player hi chu kan ngaihven lo. Eng thil nge thleng mek a, Manchester United player a la ni reng em tih pawh ka hre chiang lo. Chutiang thilah chuan kan inrawlh lo hrim hrim a ni," a ti.
Deco chuan sawi chhunzawmin, "Eng emaw tih kan tum hmain thil awmdan kan hriatthiam hmasak phawt a ngai a, rawlthar naupang te te chungchang sawi kual hi kan hna a ni lo," tiin a sawi bawk.
