Manchester United captain Bruno Fernandes chuan an club tan thlaphanna a thlen a, Portugal tana a match khelh leh turah he midfielder hi a inlan theih loh hmel ta. Kum 32 mi Fernandes hi ram chawlh (international break) chhung hian Nations League match khel tura a ram squad-ah a awm mek a ni.
Tun season chhungin Fernandes hi Premier League leh Champions League-ah United tan a inlan kim vek a, international break chhunga match li an khelh tur atan pawh Portugal 23-man squad zingah koh a ni. Mahse, Pathianni zana Norway nena an inhmachhawn hunah erawh hliam avangin Fernandes hi a inlan thei dawn lo niin a lang.
Ningani zana 1-0 a Wales an hneh ṭum khan Fernandes hian bul a ṭan a, mahse an ram manager Jorge Jesus-a'n "buaina khirh tak" (complicated problem) tia a sawi avangin khelmual pawn lamah a ṭhut a ngai dawn ta a ni. Jesus chuan Ningani zana Denmark an hmachhawn hunah erawh Fernandes hi chhawr theih a inbeisei thu a tarlang.
Inrinni zan khan Portugal boss Jorge Jesus chuan, "Manchester United aṭanga a rawn ken luh hliam nei chungin a khel a ni. Wales lakah khan khelh a duh em em tlat a," tiin a sawi. Sawi chhunzawmin Jesus chuan, "A khelh ṭhin dan pangngai ang khan a khel thei lo a, a inpeih leh peih loh chu kan la thlir zel ang. Match thum vel zet chu he na hi a lo tuar tawh thu a sawi a, hei hi Wales laka a theihna tak tak a phochhuah theih loh chhan zinga mi a ni," a ti bawk.
Jesus chuan sawi belhin, "Ka lo enkawl tawh ṭhin player a ni a, a mizia ka hrechiang em em a ni. Amah pawh ka be tawh a. He inkhelah hian hliam zual theihna dinhmuna dah ai chuan, Denmark nena an inhmachhawn hun atana taksa lamah inpeih sa leh fithla tak nia a awm ka duh zawk a ni," tiin a tarlang.
Manchester United hian October ni 10-ah chauh Premier League an khel leh dawn a, Old Trafford-ah Tottenham Hotspur chu mikhualin chak zawk nih leh ngei an tum ang. United head coach Michael Carrick chuan he match-ah hian an captain Fernandes hi a inlan theih ngei a beisei a, international break chhung hian United lamin Fernandes-a dinhmun leh a fitness hi uluk takin an thlithlai chhunzawm dawn a ni.
Fernandes bakah hian United hian Marcus Rashford leh Kobbie Mainoo te dinhmun pawh an ngaihven zui hle dawn a, anni pahnih hian international break inṭan hma khan England squad aṭangin an inhnukdawk tawh a ni. Striker Benjamin Sesko pawh hliam avangin Slovenia squad aṭangin a inhnukdawk bawk. Chutih rualin ram tana inelna a inṭan hma khan Amad Diallo, Matthijs de Ligt, Manuel Ugarte leh Tom Heaton te pawh hliam avangin an lo chawl tawh bawk a ni.
