Roma chuan an midfielder Manu Kone man atan an chhiar zat chu an tihsan leh tawh nia report a chhuah tak avangin, Manchester United-in he player lakluh an lo tumna kawng chu a harsa zual dawn ta a ni. Kumin nipui transfer bazar chhung khan United hian tlar laili thuamchakna tur player lakluh an duh hle a, he France international pawh hi an ngaihven zual zinga mi a ni hman a ni.
United hian kumin nipui chhung khan tlar laili thuam nan player thar pathum ngawt mai an la lut hman a. Chelsea aṭangin Andrey Santos, Aston Villa aṭangin Youri Tielemans leh Brighton aṭangin Carlos Baleba te chu a nghetin (permanent deal) Old Trafford-ah an la lut fel tawh a ni. Chutih laiin, kum 25 mi Kone-a hmabak erawh sawi zui a hlawh hle a, a bikin kumin nipui World Cup-a France tana a chet ṭhat em avang khan club lianten an ngaihven zual a ni.
Chelsea pawhin bazar khar dawn lam khan Kone hi lakluh an lo tum ve hman a, a bikin Enzo Fernandez-a'n £125m-a Manchester City a zawm hnu khan an ngaihven zui hle. Gazzetta dello Sport tarlan danin, Roma hian Chelsea-in Kone-a man atana €60million (£51.6m) an thehluh chu an lo hnawlsak tawh a. Tunah chuan Serie A club hian Kone hi chhuahtir tur chuan tlem berah €100million (£86million) lai an phut tawh dawn a ni. Chelsea hian Monaco star Lamine Camara pawh kha deadline day khan lakluh an lo tum ve bawk a ni.
Midfielder pathum an lakluh hnu khan, United hian Luke Shaw leh Patrick Dorgu te cho thei tur left-back thar lakluh pawh an tum hle a. Season liam ta tawp khan Tyrell Malacia chuan free agent-in club a chhuahsan a, mahse United hian a thlaktu tur an la lut ta lo a ni. Hemi avang hian kumin January thla hma chu Shaw leh Dorgu te chiah hi senior squad-a left-back chhawr theih awmchhun an ni rih dawn a ni.
International break zawh hnuah United hian Premier League khel turin kar hnih dang an la nghah a ngai dawn a, October ni 10-ah Old Trafford-ah Tottenham Hotspur an mikhual dawn a ni. Kone-a chungchangah hian January transfer window-ah emaw, nakin nipui bazarah emaw United hian dawrna thar an thehlut leh ang em tih erawh thlir thui a ngai ang.
