Pathianni hian Manchester United chuan Premier League match pawimawh takah mahni mual Old Trafford-ah Bournemouth an mikhual dawn a. He inkhel hmachhawn tur hian United head coach Michael Carrick chuan Bournemouth striker Junior Kroupi a dam tawh tih chanchin a hre tel leh ta a ni. Mikhual Bournemouth hi Europa League-ah AC Milan lakah 3-0 a hnehna ropui tak changin an rawn inlan dawn a, lehlamah United erawh Champions League-ah Como lakah 4-1 ngawtin an tlawm a, tun season game 11 an khelh tawhah vawi hnih chiah hnehna an la chang thung.
Pathianni inkhelah hian an chesual leh a nih chuan Carrick hian a hna a chan mai a hlauhawm hle a. A hmabak chungchangah hian sawi a tam tawh hle a, Chelsea leh Tottenham manager hlui Antonio Conte pawhin he hna hi a awt hle niin thawm a awm bawk. Chutiang thuthang karah chuan Carrick hian mualneitu an nihna hmangin point thum hmuh ngei a mamawh takzet a ni.
AC Milan lakah mawi takin hnehna chang mah se, Marco Rose-a hnuaiah Bournemouth hian Premier League lamah beisei an la phak chiah lo a, league table-ah 15-naah awmin Old Trafford an pan dawn a ni. United tan point thum hmuh ngei a ngaih laiin, Carrick-a tana chanchin ṭha lo ber chu Bournemouth forward Junior Kroupi chu Old Trafford-ah a rawn kir dawn tih hi a ni. France Under-21 international hi Arsenal leh Premier League club dangte ngaihven a lo hlawh tawh hle a, Gunners pawhin an lo thlithlai tawh a ni.
Austria rama Bournemouth pre-season training camp an neih laia a ke ruh (metatarsal) a tihhliam avangin Kroupi hi tun season-ah a la inlan miah lo a. Kum 20 mi striker hi an zai hnuah khelmualah kir leh turin a inbuatsaih chho mek a ni. The Sun-a Manchester United chanchinbu mi Katherine Walsh-i'n a tarlan danin, Rose chuan press conference-ah Kroupi chu United laka a inlan theih tur thu a sawi a: "Kan ruahmanna chu Manchester-ah hruai ve a, minute tlem a zawng tal inkheltir kha a ni," tiin Rose chuan a sawi a ni.
Nilainia Milan an hmachhawn hma pawh khan Rose hian Kroupi chungchang hi lo sawi tawhin, "Junior hi team-ah a rawn kir tawh a, mahse UEFA list-ah a tel loh avangin (Milan lakah a khel thei lo a), Manchester-ah erawh minute tlem a zawng chu kan chhawr theih ngei ka beisei," a lo ti tawh bawk a ni.
Bournemouth Europa League squad-ah a hming a tel loh avangin Milan lakah inlan thei lo mah se, season liam taa an club tana khel ṭha em em Kroupi hi United lakah erawh chhawr theih a ni dawn ta. Lorient player hlui Kroupi hi season liam ta khan league match-ah goal 13 ngawt khungin Cherries tana goal khung hnem ber a lo ni tawh a ni.
A chawlh chhung hian Rose chuan Bournemouth tlarhmaah Evanilson leh kumin nipuia an lak thar Alvaro Rodriguez te a chhawr a, mual sirah tlan chak tak Rayan a chhawr bawk. Kroupi hian United lakah pawh record ṭha tak a nei a, season liam taa an inkhelh ṭum hnihah (4-4 leh 2-2 a an inhnehtawk ṭumin) goal khat ve ve a lo thun tawh a ni.
Carrick-a'n tlarhnung lailia Harry Maguire, Leny Yoro, Ayden Heaven leh Matthijs de Ligt zinga a tu ber nge bul ṭantir ang tih chu chhanna mamawh lian tak a ni a, Kroupi-a lo kir hian United tlarhnung tan fimkhur a ngaih zia a tilang chiang hle a ni.
