Manchester United forward Joshua Zirkzee chuan Old Trafford-ah inkhelhna hmun a chan tlem chhanah amah ngeiin mawhphurhna a la a, head coach Michael Carrick-a'n khelmualah hun tam zawk a pek theih nan amah ngei a chet ṭhat a ngaih thu a puangchhuak.

Nations League match hmasa bera Germany an hmachhawn ṭuma Sunderland striker Brian Bobbey a hliam tak avangin, international break chhung hian Netherlands squad zawm turin Zirkzee hi a tlai khawhnuah koh a ni a. Kum 25 mi forward hian November 2024 hnuah Netherlands tan match a la khel leh miah lo a ni. Amaherawhchu, Barcelona midfielder hlui Xavi chuan Dutch manager hna a chelh tawh a, kar liam ta khan Greece leh Serbia an hmachhawn ṭumin bench aṭangin a rawn luhtir a ni. Pathianni zan khan kum 25 mi hian Serbia laka 2-1 a an chak ṭumin a ram tan a goal hnihna a khung zui bawk.

ESPN nena an inkawmnaah he goal chungchang hi sawiin Zirkzee chuan, "A lut tur pawh lo ni se, Tijjani (Reijnders) khan keiin ka lo khawih nawn kher tih a hriat ka ring. Ka khawih lo a nih chuan goal ban a per ka ring zawk a ni. Mahse chet lakna fuh tak a ni a, vanneihthlak takin Reijnders nen hmun dik takah kan lo awm dun a ni," tiin a sawi.

Zirkzee chuan Xavi hian United-ah minute tam a chang lo tih hre reng chung pawhin ball a thunun thiam em avangin squad-ah a ko tih a hrilh thu a sawi a, mahse club level-ah inkhelh tam a mamawh zia erawh a sawi lang bawk. United-a dinhmun inchuhna chungchang sawi chhunzawmin Zirkzee chuan, "Tun dinhmunah chuan substitute-a luh hi ka chan tawk a ni deuh ber a. Thil awlsam a ni lo tih hre mah ila, a tawpah chuan keimah ngeiin eng emaw ka tih ve a ngai a ni. Chuti chung chuan coach-in min ko hi ka tan chuan thil mak tak a la ni tho mai," a ti.

Zirkzee hian inkhelh tam a duh avangin January thla liam ta khan United chhuahsan a lo tum tawh a, nipui transfer window chhung pawh khan chhuah a ngaihtuah leh hman bawk a, mahse United lam chuan squad player pawimawh a nih avangin an mamawh thu an lo hrilh a nih kha.

Ram tana koh a nih chungchang sawi lehin Zirkzee chuan, "Koh ka nih hi ka beisei lo hrim hrim. Bul ṭantu ka ni lo tih chu a chiang reng a, chuvang chuan coach-in ka chungah rinna nghata min ko hi nuam ka ti hle. Mahse ka beisei loh tawp thil erawh a ni chiang alawm," tiin a sawi.

Tun season chhungin kum 25 mi forward hian Manchester United tan inelna hrang hrangah match li chiahah a la inlan a, chu pawh minute 70 chauh a la khel tling a ni.