BBC Match of the Day programme khawih mektu lar Mark Chapman leh Kelly Cates te chu an inngaizawng ṭan nia tarlan a ni a. He BBC presenter pahnihte hian kumin kum tir lam aṭang khan inlaichinna thuk zawk an nei ṭan tawh niin hriat a ni.

Kum 52 mi, Lancashire-a piang leh Manchester United ṭantu Chapman hian, kum thum chhung an lo inzui tawh hnuah Dubai-a estate agent thawk Clere Collier nen an inkar chu an tihtawp thu a tarlang a. April thla khan he mi te pahnih hi beisei loh takin an inṭhen a, The Sun chanchinbu tarlan danin kum 43 mi Collier hian Chapman leh Cates-i te an inhnaih tial tial nia a rinhlelh hnuah Chapman hi a zawtfiah hial a ni.

Chapman chuan amah leh Cates-i te an inzui ngei tih chu nemnghet mah se, Collier-i lakah a rinawm loh ngai loh thu leh an inlaichinna pahnihte hi a inbual hnan miah loh thu a sawi ve thung a ni. Fa pahnih nei tawh Collier hi Chapman hmu turin UK-ah a kal zut ṭhin a, nikum lam pawh khan in leh hmun en dunin thla lak dun an lo ni tawh bawk a ni. Mahse tunah chuan Chapman hian Scotland leh Liverpool football legend Sir Kenny Dalglish-a fanu Kelly Cates chu kawppui thar atan a nei ta a ni.

Kum 51 mi Cates hi sports broadcasting lama hmel hriat lar tak a ni a, kum 2007-a a lo neih tawh TV producer Tom nena an inneihna chu kum nga liam ta khan an lo tihtawp tawh a, anni hian fanu pahnih an nei a ni. Chapman erawh hian kum 2020 khan a nupui duh tak Sara chu cancer natna avangin a chan a, kum 19 chhung inneiin fa pathum an nei hman a ni.

A nupui boral hnuah Chapman hian Collier-i lakah hmangaihna thar chhar leh mah se, a career hmasawnna erawh a ṭhuanawp phah lo. 2025-26 Premier League campaign inṭan hma khan, Gary Lineker-a'n khelmual a chhuahsan hnuah BBC chuan Chapman leh Cates te hi Gabby Logan nen Match of the Day co-host thar turin a ruat a ni. Chapman hian Logan nen 'The Sports Agents' podcast an thawkdun bawk a, nipui chhung khan Chapman leh Cates-i te hi Celebrity Gogglebox-ah pawh an lo inlan dun tawh a ni.

Sky Sports lama thawk mek bawk Cates hi Logan-i podcast 'The Mid Point'-ah pawh a lo inlan tawh a, kum 2021-a a pasal a ṭhen hnua mi dang nena inkawm (dating) chungchang a huphurh theih zia a lo sawi tawh bawk a ni.

Khamiah khan Cates chuan, "Mi nena chhuah dun a, zan khat hun hman dun hnuah, 'Ka duh zawng i ni lo tawp mai' tih rilru put leh si tur ngaihtuah ringawt pawh hian, ka hun min khawhral sak avang khan ka thin a rim ngawih ngawih ṭhin ang," tiin a sawi.

Sawi zawmin, "Anni lam aṭang pawhin chutiang chu a ni ve tho ang tih chu a chiang a, mahse an ngaihdan lam chu ka buaipui tehchiam lo - ka mi ngainat tak takte pawh ka hmu ngun hman lo a nih laia chutianga hun hman chu ka duh lo a ni. Hun rei daih inlaichinna neih vel pawh hi ka ngaihtuah thleng ngai lo. Mi tu emaw nen chhuak duna, a chanve i thlen meuhva, 'Pathian leh, he pa hi chu a van mawl tak em' tih rilru neih tur chu han ngaihtuah teh," tiin mimal ngaihdan a lo sawichhuak tawh a ni.