International break zawha Premier League match lo thleng tura Old Trafford-a Manchester United hmachhawn tur Tottenham Hotspur chuan hliam vangin buaina an tawk chho mek a, Netherlands tana inlan defender Micky van de Ven chu an player inhliam thar ber a ni ta.

Pathiannia Netherlands leh Serbia ten Nations League match an khelh ṭum khan, Eindhoven-a inkhelh tawp dawn lamah Serbia forward Luka Jovic chuan Tottenham captain Van de Ven-a ban dinglam/veilam chu a rap fuh palh a ni. He thil thleng hnu hian Van de Ven hi na tiin a vial ngawng ngawng a, a kut veilam vuanin a awm zui a. Netherlands captain Virgil van Dijk chuan a va bawhzui hmasaber a, hemi hnu hian medical staff pahnih rawn tlan lutin mual pawn lamah an kuah chhuak ta a ni.

Dutch head coach Xavi chuan player thlak theihna vawi nga a neih chu a lo hman zawh tawh avangin, Dutch team hi minute tlem te chhung chu mualah mi 10 chauhin an awm phah a. Chuti chung chuan 2-1 in hnehna an chang hram a, half-time a rawn lut Manchester United striker Joshua Zirkzee chuan chakna goal a khung a ni. He goal hi Zirkzee tan chuan season liam taa Wolverhampton Wanderers nen 1-1 a an inhnehtawk ṭuma Ruben Amorim-a match hnuhnung dawla goal a thun hnuah, club leh ram tana inelna tak taka goal a khung leh hmasak ber a ni.

Match zawha press conference-ah Xavi chuan Van de Ven-a dinhmun chungchang sawiin: "A ṭha e, a zungṭangah hliam a tawrh avangin a lu a hai deuh mai a ni a, hliam lian tham lutuk chu a ni lo," tiin a sawi.

Van de Ven hi he international break chhunga Serbia laka rap fuh palh vanga hliam tuar Tottenham Dutch defender pahnihna a ni a. Kar khat kalta maia Belgrade-a an match hmasa zawkah khan kumin nipuia Spurs-in an lakluh thar Jan Paul van Hecke pawh hetiang chiah hian a lo inhliam tawh bawk a ni.

Van Hecke hian Serbia laka 2-1 a an chak ṭum khan inkhelh tluan thei mah se, Zeist-a training an neih ṭumin minute sarih chauh a khelh hnuah Xavi nen inbiain dugout lamah a ṭhu chhuak a, hemi hnu lawk hian squad aṭanga inhnuhdawh a ni zui ta a ni.

Greece hmachhawn tura Thessaloniki pana zin ve lovin he defender hi Tottenham lamah a kir leh ta zawk a. Serbia laka thil thleng chungchang sawiin coach Xavi chuan: "Serbia nena kan inkhelh lai khan tute emawin an rap palh a. Inkhelh lai chuan a na a hre mai lo a, mahse match zawh hnuah erawh khelh chhunzawm theih rual a ni ta lo a ni.

"Khelh chhunzawm chu a tum ve hle a, mahse a na a tuar nasa em em a. Chuvang tak chuan list aṭanga paih chu kan thutlukna a ni ta a ni. Thawhlehniah recovery training neih a tum a, Nilainiah pawh a bei nawn leh a, mahse ball pawh a tawk thei meuh lo a ni," tiin a sawifiah bawk.

International break zawha Old Trafford-a Manchester United leh Spurs inhmachhawn hunah Tottenham tan tlarhnung dinhmun a ngaihtuahawm chho hle dawn niin a lang a ni.