Manchester United defender Leny Yoro chu nakin zela Arsenal transfer target pawimawh tak a la nih theih thu sawi lan a ni a. He centre-back naupang tak hian Old Trafford chhuahsana Emirates Stadium a pan a nih chuan a theihna tak tak a phochhuakin a langsar zual (shine) hle dawn nia ngaih a ni.
Kum 2024 nipui bazar chhung khan Manchester United chuan Lille aṭangin £52million sengin Yoro hi an lalut a. Kum 20 mi French centre-back hian kum hnih liam ta chhung khan United tan inelna hrang hrangah match 69 lai a khel tling tawh a ni.
Old Trafford a pan hma hian Europe khawmualpuia club lian hrang hrangin an lo ngaihven nasa hle a, Real Madrid, Liverpool leh Arsenal te pawh he defender lakluh tum hian an hming a ri tel nasa hle a nih kha. Premier League-ah kum hnih chhung tawn hriat a neih tawh bawk avangin, nakinah Arsenal hian north London lama an lalut a nih chuan player lak fuh tak an ni ngei dawn niin Arsenal defender hlui Bacary Sagna chuan a ngai a ni.
Action Network nena an inkawmnaah Sagna chuan, "Ani chu hmabak eng tak nei, player ṭha chungchuang a ni," tiin Yoro chu a fak a. "Arsenal-ah lo kal ta se, Arsenal pawh an khel ṭha a nih chuan, ani pawh a rawn langsar ṭha em em ang. Chuvang chuan player theihna neih ṭhat chauh hi a tawk lo va, khatih laia team pumpui khelh dan phung kha a pawimawh hle a ni. Engpawh nise, United hian team angin hma an sawn leh ngei ka beisei a, player ṭha chungchuang a nih avangin Yoro pawh hian season ṭha tak a hman ka beisei," tiin a sawi.
Sagna chuan sawi zawmin, United chu team damlo (sick team) ang maia boruak hniam an nih laia Premier League boruaka Yoro a rawn insiamrem thei chu a fak bawk a ni. "Ani chu player ṭha dang lehzel a ni a, mahse team damlo tak mai a rawn zawm a ni. A lo luh tirh khan team kha a damlo takzet a ni," tiin Sagna chuan a sawi belh.
Arsenal right-back hlui chuan chhunzawmin, "Midang zawng an khelh ṭhat laia a theihna sang ber a phochhuak lai hmuh chu ka duh ngei mai, mahse an bul ṭan dan kha a chhe em a ni. Team an khelh ṭhat miah loh laia mimal taka han langsar bik nih chu thil harsa tak a ni a. Thil theih loh erawh a ni lo, Bruno Fernandes-a'n a ti thei tih a tichiang tawh. Mahse team pum an buai a, team a damloh tlat chuan, nang pawh i buai ve a, harsatna i tawh ve theihna chance a sang hle a ni. Defender i nih avangin i dinhmun a langsar a, tlarhnung vengtu i nihna angin season chhungin hun harsa tak tak i paltlang ngei a ngai ṭhin," tiin Sagna chuan United squad chhungrila defender-te dinhmun khirh zia a sawi chhuak bawk a ni.
