Manchester United boss hlui Ruben Amorim chuan January transfer window lo inhawng turah a club hlui United ruahmanna chu a tikhawlo ve thei tlat mai. Old Trafford-a thla 14 chhung beisei a phak loh hnuah Amorim hian kumin January thla khan United a chhuahsan a, thla reilote football chawlhsan rih mah se nipui lai khan AC Milan a zawm ta a ni.
San Siro-a a thlen hnuah he Portuguese coach hian bul a ṭan chhe lem lo va, match ruk a enkawlah vawi thum hnehna changin vawi hnih an inhnehtawk a, vawi khat chiah a tlawm a ni. Nipui bazar chhung khan Milan hian player lak nan £140m dawn lai an seng tawh a, mahse thlasik transfer lo thleng turah hian an squad thuamchak zual turin Amorim hian bazar luhchhilh leh a tum dawn niin an sawi.
Calciomercato tarlan danin, Milan hian Barcelona left-back Alejandro Balde chu lakluh an ngaihven hle a. An player Pervis Estupinan-a'n hliam a tawrh avangin thlaktu tur an zawng mek a ni. Balde hian Barcelona-ah contract kum hnih dang la nei mah se, tun season chhungin first team tan minute 12 chauh a la khel a. Barcelona tan hian Joao Cancelo leh Eric Garcia te an inlan deuh chawt avangin Balde hi January transfer-ah chuan chhuak thei dinhmunah a ding a ni.
Milan bakah hian Manchester United pawhin Balde hi an lo ngaihven tawh ṭhin a, nipui bazar lai pawh khan lakluh an lo tum hman a, mahse Camp Nou-ah a la cham ta zawk a nih kha. United hian Luke Shaw elpui thei tur left-back lakluh an duh em em reng a, Balde hi an player duh berte zinga mi a ni. Amorim leh Milan te hian Balde hi an lalut a nih chuan, United tan chanchin lawmawm a ni dawn lo va, Rayan Ait Nouri emaw Joaquin Seys emaw lam an hawi a ngai tawh dawn a ni.
Hemi bakah hian Milan chuan United forward Joshua Zirkzee pawh an mit an fuktir bawk. Netherlands international forward man atan hian United chuan £30million (€35m) vel an beisei niin an tarlang a, Amorim pawhin a hmaa a lo enkawl tawh he player hi lakluh a duh hle nia hriat a ni. Season liam ta khan interim manager Michael Carrick-a hnuaiah Zirkzee hian minute 100 pawh a khel tling lo va, chhuak mai tur anga ngaih a ni hman a ni.
Mahse 2026-27 campaign-ah hian striker Benjamin Sesko a hliam tak avangin Zirkzee hian bench aṭanga luhna hun remchang a hmu chho leh a. Khelmuala hun a hman tam takah chuan Dutch national team-ah koh kir leh niin, hliam vanga inlan thei lo Brian Brobbey-a hmunruak a luah a, kar liam taa Nations League-a Serbia 2-1 a an hneh ṭum pawh khan chakna goal a thun nghe nghe a ni.
Chuti chung pawhin United chuan he kum 25 mi hi hralh an la inpeih reng tho va, a ngheta hralh nan £30m bawr vel an phut rualin a tir lama loan-a chhuahtir pawh an hnawl lo. Nipui liam ta khan Fiorentina chuan £30m thehchhuakin lakluh an tum a, mahse Juventus zawm duh zawk Zirkzee hian a lo hnawlsak a ni. Tunah erawh Milan lam hian ngaihvenin, Amorim nen an inzawm leh theihna kawng a inhawng chho hle a, a tirah loan hmanga lakluh chu an duhthlan ber nia sawi a ni bawk.
