Manchester United forward hlui, tunah Brazilian club Corinthians tana khel mek Memphis Depay chu khingpui lam ṭantute laka chet dan mawi lo a lantir nia puh a nih avangin chhui mek a ni a, hun engemaw chen inkhel thei lova hrem theihna dinhmunah a ding mek a ni.
Ningani khan Copa Libertadores quarter-final match-ah Corinthians leh Argentina club Estudiantes te chu an inhmachhawn a. Inkhel ṭan tir teah Estudiantes player Alex Castro chuan minute 4-na lekah mualneitu lam tan goal a khung nghal a, Depay leh Corinthians te hi an hnufual nghal der a ni. Mahse second half ṭan hnu lawk, minute 49-naah Kaio Cesar chuan Corinthians tan an siphurh chu a rawn sut ve leh ta a ni.
He goal an lawm lai tak hian buaina a chhuak zui ta a; Depay hian a ṭhiante nena goal lawm tura a tlan phei laiin, mualneitu Estudiantes ṭantu mipuite lam hawiin a kutzunglai (middle finger) a tipir nia hriat a ni. He thil thleng avang hian stadium chhunga mipuite chuan au elin an thinrim hle a. Depay pawh hian referee hnenah amah vawm nana hman thil eng emaw a laka an rawn vawm thu a thlen ve bawk a ni.
Mahse Depay-a chet dan mawi lo hian Estudiantes hotute thin a tirim hle a, CONMEBOL disciplinary unit hnenah he thil thleng hi an thlen ta a ni. Match zawh hnuah Estudiantes chuan thuchhuah siamin, "Khingpui player Memphis Depay-a'n kan ṭantute ṭhutna lam hawia chet dan mawi lo a lantir ngei a ni tih hai rual a nih loh avangin, CONMEBOL disciplinary unit hnenah zualkona lehkha kan thehlut ta a ni," tiin an puangzar a ni.
Quarter-final second leg hi kar tharah khelh a ni dawn a, he buaina chungchangah hian Corinthians chuan thuchhuah siamin an forward hian second leg hi a khelh theih ngei an beisei thu an sawi. Corinthians chuan CONMEBOL dan phung tarlangin, "Insawifiahna lehkha thehluh theih hun tawp atan CONMEBOL chuan September 17 a ruat a, hei hi Copa Libertadores quarter-final second leg khelh zawh hnu ni khat leka awm a ni," an ti.
Corinthians chuan sawi chhunzawmin, "Chuvang chuan, hremna eng pawh awm thei chu thutlukna siam a nih hnuah chauh hman theih a ni ang a, chu thutlukna chu insawifiahna thehluh hnuah chauh siam a ni bawk dawn a ni. Hun tiam duan chhung ngei hian, Corinthians chuan Memphis Depay-a laka hremna pumpelh a nih theih nan insawifiahna lehkha hi kan thehlut dawn a ni," tiin an sawi. Dan ang a nih chuan Depay hian second leg match hi a khelh theih hmel a, mahse thiam loh chantir a nih tak hlauh chuan hma lam inkhel turah hremna a hmachhawn mai thei a ni.
Kum 32 mi Dutch forward Depay hian kum hnih leh a chanve chhung zet chu Manchester United-ah hun a lo hmang tawh a. Old Trafford club tan hian match 53 inlanin goal sarih a khung a, midang pet luh tur vawi nga a siamsak tawh bawk a ni. United-ah hian beisei a phak meuh lo va, hun harsa tak a lo paltlang tawh a nih kha.
Kumin nipui bazar chhung khan Corinthians-a a hmabak tur chungchangah pawh buaina a lo chhuak nual tawh a. Club lamin contract thar an zawrh loh avangin social media lamah Depay hi a lungawi loh thu a lo au chhuahpui tawh hial a ni. Khatih lai khan Depay chuan, "Kum hnih dang daih contract pawtsei tura kan inremna awmsa chu Corinthians-in zahsak an tum lo tih hriat chu a lungchhiatthlak takzet a ni. He contract thar ziahna tur hi club president bakah sporting, dan lam (legal) leh sum enkawltu (financial) department-te pawhin fiah takin an lo pawm vek tawh a ni. Mahse, mi ṭhenkhat chuan he inremna hi bawhchhiat an thlang ta zawk a ni," tiin a lo ziak tawh a.
Depay chuan sawi chhunzawmin, "Hetiang dinhmun hi ka duh hauh lo va, he thil kalpui chhung zawng pawh hian club hi ka zah em em reng a ni. Mahse tun dinhmunah chuan ka dikna chanvo humhim nan na taka chet ka la a ngai ta a ni. Ni reilote hnuah mipui hmaah thil awmdan ka la sawichhuak ang a, hetianga pawmzam theih miah loh khawsak dan hi engtin mah ti lova ka enliam mai mai dawn lo tih erawh ka chiang a ni," tiin a sawi bawk. A hnu zelah a hlawh tlem zawk lak a pawm tak hnuah Corinthians nen hian contract thar an ziak fel zui ta nge nge a ni.
