Manchester United head coach hlui Ruben Amorim chuan Old Trafford a enkawl laia media lama amah lo sawisel ṭhintu United player hlui hmingthangte lakah a lungawi lohna a phawrhchhuak.
Kum 41 mi, tun hnaia Italian club lian AC Milan enkawltu Amorim hi, club hotu lian (hierarchy) te nena an inkar a chhiat tak avangin kumin tir lam khan United chuan an lo ban a nih kha.
A hna aṭanga an ban hma hian, United chanchina Premier League-a an chet chhiat ber ṭum a thlenpui a, match 63 a enkawlah hnehna vawi 24 chauh a chang a ni. Europa League final-ah Tottenham lakah an tlawm bawk a, hetiang a nih avang hian Old Trafford-a a awm chhung zawng khan sawiselna nasa tak a tawk reng a ni.
Tunah hian San Siro-ah awmin, Milan pawh chanchin ropui leh legend tam tak lo chher tawh club an nih miau avangin, United-a a tawh ang tho boruak chu a hmachhawn ve leh mek bawk.
Pre-season-ah United an hneh aṭanga ṭanin, Milan chu game li chhung tlawm lovin a kalpui a; Torino leh Venezia an hneh hnuah khualmualah Juventus nen an inhnehtawk a. Juve lakah hian point thum hlawhchhuak mai tura lang ni mah se, minute 92-naah goal an chhuah tak hlauh avangin table-ah parukna dinhmun an luah mek a ni.
Club thara a hun ṭan dan hi mi tam takin fak viau mah se, United-a a hun hman liam tak erawh kha chu Amorim tan chuan hun hrehawm tak a tling a ni. Gary Neville te ang TV pundit langsar ten na tak taka an lo sawisel ṭhin kha he Portuguese coach hian a lo chhanglet tawh ṭhin a, tunah hian an chungchangah ṭawngchhuak lehin, hetiang club player hluite hi "ṭawng tam lutuk" an nih thu a sawi ta a ni.
Club legend-ten khelmuala thil thleng an thlir dan leh an sawiselna chungchang an zawhna chu chhangin Amorim chuan: "Hmanah khan legend tam tak awmna club [Manchester United]-ah ka lo awm tawh a, anni chuan ngaihdan lian tak tak an nei a, thil an sawi tam hle bawk. Anni lo khawsak tawhna hun lai kha chu a danglam hlak a ni," tiin a sawi.
United sawisela hming langsar tam zawk hi Sir Alex Ferguson-a'n club ropui taka a hruai laia khel an ni tlangpui a. Kha mi hun lai kha chuan Red Devils te chu Premier League lalber an ni a, Champions League khel turin an tling ziah ṭhin. Mahse tun dinhmunah chuan United chu an nihna hlui lakah an hla tawh hle a, league title an lak lohna pawh kum 13 lai a tling ta a, Europe inelna sang ber luh pawh an tan thil chiangsa a ni tawh lo a ni.
Amorim-a'n United a chhuahsan hma khan, Paul Scholes chuan Amorim chu "mi dik tak a ni lo" a, "club nihna pawh a man lo" tiin a lo sawi tawh a. Hemi ṭum hian Milan boss chuan player hluite chuan thu chiang leh thil awmzia engkim an hriat vek loh vanga hetianga sawi mai mai an nih thu a lo sawi let tawh a ni.
Amorim chuan sawi chhunzawmin, "Thil pangngai ve reng a ni tih chu ka hria. Manchester United manager ka nihna angin, kan tlin tawk aia hniamin kan khel tih chu thudik a ni. Point tam zawk kan hmuh a ngai a, a bikin tun season-ah khan. Chuvangin sawiselna pawh hi ka pawm thlap e.
"A chang chuan thil thlen dan chanchin kimchang an hre vek lova, Manchester United hi anmahni lo awm tawhna boruak leh standard, englaia hnehna chang reng ṭhin anga thlirin an thlir ṭhin a ni. Chuvangin an club hetianga a tlahniam ta mai hi an tan pawh hmuh a harsa a ni," tiin a sawi a ni.
Amorim-a'n a chhuahsan hnu hian United chuan an player hlui Michael Carrick chu permanent manager atan an ruat zui a, Carrick-a'n tha thar rawn pein United chu Champions League khel turin a hruai let leh ta a ni.
