Manchester derby-a mualzawla ṭhu mek Phil Foden-a laka Manchester United captain Bruno Fernandes-a chet dan chungchangah, Fernandes-a hian yellow card a hmuh ngei a ngai nia a hriat thu Chief Refereeing Officer Howard Webb chuan a sawi.
Match chhunga thil thlengah hian, Fernandes-a'n mualzawla a tluk hnuah Foden-a hi a pet hmasa zawk a, he thil thleng avanga Foden-a'n thinrim taka chhang letin Fernandes-a pum hnuai lamah ke hniha a pet ve tak avangin referee Michael Oliver chuan red card a hmuhtir nghal a ni. Hetih lai hian, he thil thlenga chhaih kawhtu hmasa Fernandes-a erawh hremna engmah pek a ni lo thung.
Video Assistant Referee (VAR) lam hian referee-in khelmualah thutlukna siamin red card a hmuhtir tawh miau avangin, Fernandes-a hnenah yellow card pe turin referee hi an hrilh (recommend) thei ta lo a ni.
Referee-te hotu ber Webb chuan 'Match Officials Mic'd Up' show-ah sawiin, "Michael Oliver-a'n Foden-a laka red card a hmuhtir hi ka pawmpui takzet a ni. Fernandes-a taksa chung lamah chak takin a pet a ni a, he thil hi tharum thawh a, player dang tihnat tumna (violent conduct) a ni. Tun season tir lam khan Aston Villa player Joao Gomes pawh hetiang chiah hian red card pek a lo ni tawh bawk a ni," tiin a sawi.
Webb chuan sawi zawmin, "Mahse inkhel video kan en nawn erawh chuan, Fernandes-a'n Foden-a mawng lama a pet-na kha a lang chhuak a. Hei hi tharum thawh tling khawpa na a ni lova, mahni inthunun zo lo (petulant) chetna a ni zawk. Red card ni tur chuan tharum hman a nihna (excessive force) a lan a ngai a ni. Chuvang chuan Fernandes-a chet dan hi yellow card hmuhna tur a ni. Mahse VAR hian referee hnenah yellow card pe turin monitor en nawn tura hrilh dan dan pui puate a awm loh avangin inrawlh theihna a nei tawh lo a ni," a ti bawk.
PGMOL (Pro Ref) lam pawhin he incident chhunga VAR room audio an tihchhuahnaah, VAR leh assistant VAR-te chuan a tirah Fernandes-a hian Foden-a pet lova ball a pet zawk ang in an lo hmu sual deuh a. Assistant VAR-in Bruno-a pet hmasak zawk kha a lo sawi meuh chuan, VAR chuan "A na lo em mai, chutiang inrawlh a ngai lo," tiin thutlukna an siam ta a ni.
Manchester United player hlui Roy Keane chuan Sky Sports-ah he thil thleng hi sawiin, Fernandes-a chet dan chu 'tharum thawh zawk' nia a hriat thu leh Foden-a red card pek chu a na a tih thu a sawi. Keane chuan, "Bruno-a'n a va tackle a, a foul a, mualzawlah a pet zui bawk a. Foden-a'n a chhang chhuak ta a nih kha. Bruno-a ber kha a violent zawk tlat a ni. Foden-a chet dan kha red card tlingin ka hre lo," tiin a sawi bawk.
Match minute 23-naa red card hmutu City forward Foden-a hi match thum hrem a ni dawn a. Premier League dan ang hian red card hremna hi domestic inelna dang zawng zawngah (Carabao Cup leh FA Cup tiamin) a kal tlang vek a ni. Chuvang chuan Ningani zanlama Norwich City nena Carabao Cup an khelh turah Foden-a hi a inlan thei dawn lo a, kumin inrinni-a Sunderland an hmachhawn tur leh, international break hnua October ni 11-a Liverpool an luhchhuah turah pawh Foden-a hi a inlan thei dawn lo bawk a ni.
