Beiseina sang tak nena season thar 2026-27 an thlir laiin, Manchester United fan-te chuan thla khat chauh a liam hnuah boruak duhawm lo tak an hmachhawn leh ṭan ta a. Head coach Michael Carrick-a hmabak chungchangah zawhna a chhuak chho nghal der mai a ni.
Carrick hi lailawk (interim) boss a nih lai khan a hlawhtling em em a, mahse Ole Gunnar Solskjaer-a chanchin ang deuh khan manager nghet (permanent manager) a nih hnuah erawh thil a kal tluang ta meuh lo. Tun hi season bul ṭanna chauh la ni mah se, Carabao Cup-ah Brighton laka 2-0 a hma an hruai hnuah 3-2 ngawta an tlawm takah khan an harsatna neih lenzia chu a lang chiang hle a ni.
United fan-te chuan Carrick hian he dinhmun hi a siamṭha thei ang em tih an ngaihtuah mek laiin, an striker hlui Louis Saha chuan United hian Casemiro an chhuah tir tak avangin nghawng lian tak an tuar mek niin a ngai tlat thung. Casemiro hi a contract a zawh hnu, June thla khan chhuah zalen niin MLS club Inter Miami a zawm fel tawh a nih kha.
Kumin nipui chhung khan United chuan an tlar laili thuamṭhat nan Andrey Santos, Youri Tielemans leh Carlos Baleba te chu an lalut a; amaherawhchu Baleba erawh a kerek hliam avangin a la inlan thei rih lo a ni.
Betano nena an inkawmnaah Saha chuan season liam taa interim boss a nih laia Carrick-a hlawhtlinpui tak tak tu chu amah Carrick-a thluak nilovin Casemiro zawk a nih thu a sawi a ni.
Saha chuan, "Tunah chuan team hi a kaihhruai a, an khelh dan phung, kalhmang leh an rhythm te hi an neih theih nan puih a ngai a ni. Heng zinga ṭhenkhat hi chu player i neih aṭangin amahin a lo awm mai ṭhin a, mahse a bak zawng erawh manager aṭanga lo chhuak tur a ni.
"Season liam ta khan heng tam zawk hi Casemiro aṭanga lo chhuak a ni a. Tun thlengin a thlaktu tur an la nei lo. Mi ṭhenkhat chuan tha a nei tawh lo an ti ṭhin a, mahse Manchester United thil chan tak hi han thlir ta che u. Ani kha chu team chhung nung tirtu (animator) a ni a, an thiltih laiah midang zawng zawng hnenah inrintawkna a pe ṭhin. Remchang a hmuh apiangin chet a la ngam a, risk a la ngam a, an khelh dan phungah khan a hriat theih hle a ni.
"Midfielder ropui tak a nih chhan leh kum tam tak chhunga a lo pholang tawh chu hetianga balance ṭha a thlen vang hi a ni. Tunah pawh club-a player awmsa te hmang hian an nei leh thei ngei ang, mahse tunah chuan Michael Carrick-a'n manager a nihna angin team-ah he balance hi a thlen a ngai ta a ni," tiin a sawi.
Baleba hian kerek hliam a neihsa nen Old Trafford hi a thlen avangin, international break zawh hma chu a debut a siam thei dawn lo a ni. Saha chuan sawi chhunzawmin: "Carlos Baleba hian hliam aṭanga a lo kir leh hunah he balance hi a rawn thlen maithei a, hei hian Bruno Fernandes pawh striker-te tana hunṭha siamsak turin zalenna a pe thei bawk ang.
"United hian ball chhuhsak thiam, tlante hnenah ball pe thei, mipui boruak tichho thei leh team phurrit chhawk thei tu an mamawh a ni. Tlar lailiah player che rang leh thluak fing tak an mamawh a, hetiang player hi an nei rih lo a ni," a ti bawk.
United hian Baleba lakluh nan kumin nipuiah khan £65 million lai an seng a, a man hi a la pung chho thei bawk. Tielemans chu a lo luh aṭangin a khel ṭha viau laiin, Andrey Santos erawh a la talbuai hle a, Brighton laka an inkhelh ṭum pawh khan a theihna pholanna hunṭha a bawhpelh a nih kha. Casemiro awm loh chu la hriat viau mah se, sum tam tak sengtu United tan chuan hmalam chauh thlir a hun tawh hle a ni.
