Manchester United chuan an academy rawlthar langsar JJ Gabriel-a'n chhuah a dilna chu hlamchhiahin, a hnenah official scholarship contract an chhawpchhuahsak ta nia The Guardian chuan a tarlang.
He rawlthar theihna ngah tak hian kumin nipui kalta, thla khat liam ta vel khan Old Trafford chhuahsan a lo dil tawh a, chu a ngenna chu United lam hian an lo hnawlsak a ni. Tun kar chhung hian Gabriel hi kum 16 a tling ve chiah a, United hian an club-a chelh zui zel tumin hma an la nawn leh a ni.
Gabriel hi season liam ta khan Under-18 Premier League-a player ṭha ber (best player) atana thlan a lo ni tawh a. Hetiang khawpa rawlthar theihna sang hi Old Trafford-ah hian ngaihven a hlawh em em a, mahse thil thleng mek en erawh chuan United hian an chan hlauhawm tak dinhmunah an ding mek a ni.
A kianga awmte thurawn avanga United chhuahsan duhna nei nia sawi Gabriel hi club lian hrang hrang — Real Madrid, Barcelona leh Bayern Munich te chuan an lo enthla reng a. Nikum lam pawh khan Manchester City chuan he rawlthar hi an academy lamah hruai tumin an lo bei tawh bawk a nih kha.
Thla khat liam ta chhung zawng khan United chuan Gabriel hi chhuah mai tir an tum loh thu sawi reng mah se, contract thar an chhawp chung pawh hian he rawlthar hian Old Trafford a chhuahsan a la rinawm ta reng tho a ni. The Guardian tarlan danin, United hian he official scholarship contract hi an chhawp lo a nih chuan, Premier League dan hnuaiah rawlthar hi January thla aṭangin an elpui club dangte hnenah man nei miah lovin a chhuak thei dawn a ni.
Premier League dan chuan squad tana chhawr theih rawlthar te hi season thar atan club lamin scholarship contract mumal an chhawpsak loh chuan, an elpui dangte hnenah an thlawnin an inpe thei tih a tarlang a. Hei vang hi a ni ngei ang, Gabriel-a'n sign a duh dawn lo tih hre reng chung pawhin United-in contract an la chhawp luih ni.
Hetianga offer an pek tak avang hian, England club dangin Gabriel hi lakluh an duh a nih chuan United nena indawr hmasak ngei a ngai tawh dawn a ni. Inremna an siam thei lo a nih pawhin, Professional Football Compensation Committee (PFCC) tribunal kaltlangin zangnadawmna sum (compensation) bithliah a ni dawn a, mahse chu chu United tan chuan £350,000 tluklek a tlem a nih theih avangin chan ropui tak a ni tho ang.
Tun kar khan United senior squad thlalak tihchhuahah he rawlthar hi a tel a, mahse United fan-te chuan hei vang hian a rilru a thlak ta thut tihna a ni lo tih an hre chiang hle. Kum 11 mi lek a nih aṭanga United academy zawmtu JJ Gabriel hian club dang lama a career chhunzawm a la tum hmel hle a ni.
