Tun kar tawpah Manchester United chuan Chelsea mualah Stamford Bridge an pan dawn a, inkhel pawimawh tak ni mah se team pahnihte hian hliam leh chawlh vangin player pawimawh 13 ngawt an chan maithei nia hriat a ni.

Manchester United head coach Michael Carrick tan phei chuan Stamford Bridge-a point thum hlawhchhuah a nih loh chuan a hna a chan phah hial maithei a, tun season-ah inelna hrang hrangah vawi hnih chiah hnehna an la chang a, hei hi club chanchina bul ṭan chhiat ber kum a tling a ni. United hotute pawhin a thlaktu tur te list an lo inbuatsaih hman tawh nia sawi a ni bawk.

Carrick-a naute hian London zinkawngah player paruk an chhawr thei dawn lova, chung zingah chuan striker Benjamin Sesko a tel. Sesko-a hliam hi a zual deuh avangin hun rei tak a chawlh a ngai dawn tih Carrick chuan a nemnghet a ni.

Match neih hmaa chanchinbumite a kawmnaah Carrick chuan, "Ni e, vanduaithlak takin Ben (Sesko) hi chu hun engemaw chen a chawlh a ngai dawn nia a lang. Engchen nge a chawlh dawn tih kan la chiang lova, mahse hun rei tak chawlh a ngaih hmel a ni," tiin a sawi.

Sesko-a hliam chungchang sawi chhunzawmin United boss chuan, "A tir aṭanga ka lo sawi tawh ang khan, he hliam hi eng nge a an dawn tih leh enkawl zui dan tur enfiah ngai a ni a. Tunah pawh hian kan enkawl meksak reng a ni. Mahse, player tana a thlen dan ngaihtuahin Ben-a tan a vanduaithlak hle a, team tan pawh chhawr theih a ni lo hi vuakna lian tak a ni. A rang thei ang bera a rawn kir leh theih nan kan buaipui mek a ni," tiin a sawi bawk.

United tan chanchin lawmawm erawh chu Kobbie Mainoo chu a rawn kir leh thei tawh maithei a, mahse Carrick-a'n a tarlan danin England international hi tun kar chhungin training vawi tlem te chiah a la nei thung. Marcus Rashford tan erawh he match hi a hma deuh nia ngaih a ni a, Luke Shaw, Patrick Dorgu leh Manuel Ugarte te pawhin Blues nena an inkhelh tur hi an hmaih beisei a ni bawk.

Chutih laiin mualneitu Chelsea manager Xabi Alonso pawh hliam avanga buai tak an ni a, mahse ruahmanna ṭha ṭhenkhat pawh an nei ve thung. Blues boss chuan Pep Chavarria leh Moises Caicedo te inkhel turin an inpeih tawh thu leh, hrem vanga chawl Cole Palmer pawh a rawn kir leh dawn tih a puang a ni.

Heti a nih rual hian Chelsea pawh hian player pawimawh sarih ngawt an inlan thei lo maithei a, defender Maxence Lacroix chuan tun kar khan hliam a tuar ve leh ta a ni. Lacroix hi Thawhleh zan Carabao Cup fourth round-a Liverpool an hneh ṭum khan a malpui chhah (hamstring) hliam avangin minute 45 chhung a khelh zawhin lakchhuah a ngai a ni.

Alonso chuan he defender chungchang hi sawiin, "Max-a'n hliam a tuar a, international break hmain a inpeih hman kan beisei lo. Chawlhkar tlem te chhung chu a chawlh a ngai dawn a ni," tiin a sawi.

A khapna ruh tliak vanga zai tawh goalkeeper Emiliano Martinez-a rawn kir hun tur an zawhna chhangin Alonso chuan, "Hun ṭha a awm thei maithei. Kar thar thleng kan nghah hrim hrim a ngai a, mahse inlan leh mai theihna chance a awm. Inkhel thei tura a inpeih a nih chuan hmai khuhna (face mask) vuah chungin a inlan a ngai maithei a ni," tiin a sawi zawm.

Tuesday zana squad-a tel lo Jorrel Hato leh Pep Chavarria te chungchangah Spanish coach chuan, "Jorrel chu a la inpeih lova, Pep Chavarria erawh a inpeih tawh a ni," a ti bawk. Chelsea tan hian Reece James, Joao Pedro, Jamie Gittens leh Malo Gusto te pawh tun kar tawpa inkhel tur hian an chiang lo bawk a ni.