Nilaini zan khan Manchester United Women chuan Burnley Ladies hmachhawnin match chhinchhiah tlak tak an khel a. He match-ah hian hnehna changin, an chanchina an trophy pahnihna chawi tum mek United Women hi Players' Cup-ah a sang ber dinhmunah an awm chhunzawm zel a ni.

He inkhelah hian thil lawmawm tak tak a thleng a, Swedish rawlthar Ellen Wangerheim chuan club tana a goal hmasaber a khung a, hliam vanga chawl rei tawh Jayde Riviere leh Emma Watson te pawh khelmualah an rawn kir leh bawk a ni.

Mahse, he inkhela thil chhinchhiah tlak leh hlu ber chu Celin Bizet-i'n nau a neih hnua a vawikhat nan match a rawn khel leh ta hi a ni. Bizet hi June thla khan fapa mawi tak, Gio a hring a, nau neih hnu aṭangin nu nihna leh inkhelh inpuahchahna hi reilote chhungin a kawp chho nghal a ni.

Burnley nena an inkhelhah hian minute 60-naah a thawhpui Monica Jusu Bah rawn thlakin khelmualah a rawn lut a. Red Devils tana match a khelh hnuhnung ber aṭangin ni 390 (kum khat chuang) zet a liam hnuah a vawi khat nan mual a rawn rap leh ta chiah a ni.

Match zawhah Celin Bizet chuan United fan-te hnenah thuchah hnutchhiahin, "Mualah ka kir leh thei hi ka awih thei lo hial, ni 390 zet a liam ta. Hnehna kan chang hi ka hlim em em a, Inrinni match-ah i pan chhunzawm zel ang u," tiin a sawi.

Match a zawh hian khelmual lailiah a team-mate ten hualvelin, mual a rawn rah leh theih tak avang hian phur takin lawmpuina an hlan a ni. United Women-ah hian player naupai vanga chawl ta an awm fo a, Everton-a awm mek Hannah Blundell pawh a lo naupai tawh a, tun dinhmunah hian an star player Fridolina Rolfo pawh thla liam ta khan nau a pai mek tih a lo puang tawh bawk.

Burnley Ladies an hneh hnu hian Manchester United Women hian Inrinni chhunah khualmualah Everton an hmachhawn leh nghal dawn a ni.