Manchester United chuan Premier League inkhelah vawiin Pathianni hian Old Trafford-ah Aston Villa an mikhual dawn a ni.
Tun kar tir lama Champions League inkhelah, Roma lakah first-half-ah goal hnih ngawta an phur hnuah United hi second-half-ah ropui taka rawn thawkchhuakin, 3-2 in hnehna ropui tak an sualchhuak a nih kha. He hnehna hian Michael Carrick-a hnuaia a zawnin match 9 chhung zet hnehna chang lova an lo awm tawhna chu a titawp a. Nilainia Barcelona laka 3-0 ngawta tlawm hrep tuak Villa an hmachhawn hma hian United player-te rilruah inrintawkna nasa tak a pe thar a ni.
Team chanchin lam thlir hian, kar liam taa Chelsea nena an inhmachhawn ṭuma red card hmu a hnawhchhuah a nih avangin Lisandro Martinez chu a la hrem mek a, he inkhelah hian a inlan thei dawn lo a ni. Midfielder Carlos Baleba pawh a inhliam avangin kar eng emaw zat chhung khelmual a chhuahsan a ngai dawn bawk a, Patrick Dorgu pawh a fitness ṭha famkim la nei tura a inbuatsaih mek avangin a inlan thei dawn em tih a la chiang lo bawk a ni.
Manchester Evening News chanchinbumi Tyrone chuan United dinhmun thlirin: "United hian tun hnaiah goal an chhuah hnem em em a, tlar hnungah inthlakthlengna lian tham tak a awm a ngai a ni. Diogo Dalot chu right-back-ah dah let lehin, left-back-ah Noussair Mazraoui chhawr ila, laili-ah Matthijs de Ligt leh Leny Yoro te inkawptir a ṭha ang. Baleba a awm loh tak si ah chuan midfield-ah hmunruak a awm a, Thawhlehnia bench aṭanga rawn lut Youri Tielemans kha a che ṭha hle a, Kobbie Mainoo nena inkawptirin an hmaah Bruno Fernandes dah a fuh ber ang. Form nei lo Amad Diallo aiah rawlthar Shea Lacey chu bul ṭantir ngei a ngai a, Bryan Mbeumo chu a laili-ah dahin Matheus Cunha chu veilamah chhawr zui zel a ṭha ang," tiin a thlang a ni.
Steven-a thlir dan thung chuan, Roma an hneh ṭuma an squad aṭang khan inthlakthlengna pahnih chiah a duh thung a. Amad leh Baleba te aiah Lacey leh Andrey Santos te chu bul ṭantir a rawt a ni. Roma laka minute tawpa Cunha-a goal khung tur siamsaktu kum 19 mi Lacey chu a hlauhawm hle a, hlauhna nei miah lova khingpui full-back-te nawr ngam player a nih thu a sawi bawk. Tlar hnungah pawh Dalot chu right-back-ah dah a, Yoro leh Harry Maguire te chu laili-ah inkawptirin, left-back-ah Ayden Heaven chhawr a duh bawk a ni.
Jack-a pawhin Dalot chu right-back-a dahlet ngei a ngai tih tarlangin, kar laia a chet chhiat deuh hnuah a khelh ṭhurna position-a a luh leh chuan inrintawkna a neih leh theih a beisei a ni. Baleba hliam chu pawi hle mah se, Tielemans chuan Mainoo kawppui hna chu ṭha takin a thawk thei dawn tih a sawi bawk. Lacey chu bul ṭantir ngei a duh thu sawiin, United mamawh tak kawltu a nih thu leh Cunha leh Mbeumo te inkawp dan pawh an thlak kual theih thu a tarlang bawk a ni.
