Manchester United manager Michael Carrick-a hmakhua chungchangah football thlirtute leh pundit-te inkarah inhnialna a chhuak nasa hle a, a hna aṭanga ban a nih mai pawh a rinawm chho ta hle a ni.
Premier League chanchina United season bul ṭan chhiat ber hmachhawn mektu Red Devils hi league match 10 an khelh tawh aṭangin ṭum khat chiah an la chak a, league table-ah 18-na dinhmun thlengin an tla hniam tawh a ni. International break chhung hian club hotute board meeting an nei mek a, kum 45 mi Carrick-a hmakhua hian titi a luah hle bawk.
United captain hlui Gary Neville chuan NBC Sports-ah sawiin, Carrick ban ringawt hian Old Trafford-a buaina thuk zawk awmte chu a chinfel dawn loh thu a sawi. Kum 12 chhungin manager 8 ngawt—Amorim, Ten Hag, Solskjaer, Carrick, Mourinho, Van Gaal, Moyes leh Rangnick te—an lo thlak tawh thu tarlangin, "Michael-a'n a chhuahsan thei a, a cham chhunzawm thei bawk. Ownership lamin tih tur a hria lo a ni. Player lakluh kawngah leh club executive leadership-ah zung thuk tak a puitling loh chuan tu manager pawh rawn thleng se an hlawhtling lo vang," tiin a sawi.
A unaupa Phil Neville erawh chuan Aston Villa nena 4-4 a an inhnehtawk ṭuma United tlarhnung—Noussair Mazraoui, Leny Yoro, Ayden Heaven leh Patrick Dorgu te chet dan chu sawselin, "Kha back four-ah khan manager chu ban in a awm ngei ngei ang a, relegation-ah min hnuk lut dawn hial a ni. Premier League khel phu an tling lo," tiin a condemn thung.
Sky Sports pundit Roy Keane chuan Carrick chu "politician" angin a chhal a, "A ṭawng hnem viau mai, mahse thu tak sawi a nei mang lo. A fimkhur nge pawh ka hre lo, politician ang mai a ni. Team siamṭhat ngai a sawi reng a, mahse khelmualah danglamna a awm chuang lo," tiin a sawi. Jamie Redknapp pawhin Carabao Cup-a Brighton laka 2-0 a hma an hruai hnua 3-2 a an tlawm chungchang tarlangin, midfield inlaichinna a awm loh avangin squad thuam chak a ngai a ni tiin a sawi bawk.
Manchester United midfielder hlui Paul Scholes chuan 'The Good, The Bad and The Football' podcast-ah sawiin, Carrick-a thlaktu atana Eddie Howe, Julian Nagelsmann leh Antonio Conte te zingah Conte chu Old Trafford-a hruai kir luh ngei chi a nih thu a sawi a, mahse fimkhurna zau tak nen a ni ang tiin a sawi bawk.
Spurs icon Chris Waddle chuan BBC Radio 5 Live-ah sawiin, United hi confidence hloh vang chauh a nih thu leh confidence an hmuh let leh chuan an ṭha chho leh mai ang tiin a sawi ve thung. Hemi hlan hian Jamie Carragher chuan 'The Overlap'-ah sawiin, tun season chhunga Carrick ban thut chu "thil atthlak" (ludicrous) a nih thu sawiin, season tawp thleng hun pek phawt a, nipui lama manager thar puitling ber zawn zawk tur a nih thu a sawi thung a ni.
