Manchester United chuan transfer bazar-a an tum ber pakhat atan goal khung thiam striker thar lak luh ngei an tum mek.

Nikum liam taa £73.7million ngawta an lo lak luh striker Benjamin Sesko-a'n hliam a tawrh fo avangin, Red Devils hian forward thar zawn mai loh chu duhthlan tur dang an nei tawh lo a ni.

Sesko hi khelmualah a inlan thei lo a nih chuan United tan tlar hmaah innghahna leh goal khung thiam (clinical finisher) a awm lo tlat a, hei hian an attack-ah harsatna lian tak a thlen ṭhin. Striker pangngai leh khingpui tlar hnung nawr buai reng thei an awm loh avangin, opponent defender-te tan pawh United tlar hma lo dan chu awlsam tak a ni phah reng a ni.

Heng harsatna chinfel nan hian Real Sociedad striker kum 22 mi Orri Óskarsson chu an lak luh tum ber zinga mi a rawn ni ta a. A chet ṭhat em avang leh goal a khung hnem avanga Erling Haaland-a nena an khaikhin ṭhin Óskarsson hi Spanish club Real Sociedad chuan €20m velin hralh an phal niin report chuan a tarlang.

Mahse Premier League-a United elpui dangte pawhin he Icelandic forward hi an ngaihven ve reng avangin, Old Trafford club tan hian he transfer hi awlsam takin a puitling mai angem tih erawh hriat a la ni lo a ni.