Manchester United board chuan head coach Michael Carrick-a ban chungchanga thutlukna siam turin inbiakna an nei dawn a, Sir Jim Ratcliffe telna Monaco-a Nilainia meeting an neih turah he thutlukna hi siam a nih beisei a ni.
Chief executive Omar Berrada leh director of football Jason Wilcox te chuan Carrick-a hna aṭanga ban a nihna tur thutlukna hi board hmaah an thlen dawn a ni. Season liam ta tawp hma deuh khan Carrick hian kum hnih daih contract thar a lo ziak tawh a, he contract-ah hian exit clause a tel avangin club hian tun season atana a hlawh chauh an pe a ngai dawn nia tarlan a ni.
Pathiannia Aston Villa nen Old Trafford-a 4-4 a an inhnehtawk hnu Thawhṭanni khan chawlh pek a ni a, Thawhlehni zing khan Carrick pawh Carrington training ground-ah a rawn thleng leh tawh a ni. Old Trafford stadium-a 4-4 a an inhnehtawk match hi Berrada leh Wilcox te pahnih hian ṭhudunin an thlir a, United head coach hi ban a nih theih nan thurawn (recommendation) thehluh an tum ta a ni.
Official thuchhuah nemnghet hi Ningani hma chu a awm lo maithei a, a chhan chu Carrick hi hmaichhan ngeia hrilh an duh vang a ni. Villa match zawhah Sky Sports-in an kawmnaah, Carrick chuan ama duh rualin a hna aṭanga a banna (resignation) a thehlut dawn lo tih a lo sawi chiang tawh a ni.
November international break inṭan aṭanga ni hnihnaah he thutlukna hi siam a ni dawn a, ram tana koh tel loh player-te pawh vawiin hian training neih nan an lo inreport beisei an ni bawk. Manchester Evening News (MEN) thudawnna chuan Berrada leh Wilcox te hian Carrick-a'n team dinhmun a siamṭha thei dawn tawh lo tih hria a, a laka an rinna an hloh tawh thu an tarlang a ni. Manchester United hi tun dinhmunah Premier League-ah 18-naah awmin tlak tsawlh dinhmun derthawngah an awm mek a ni.
Carrick-a thlaktu tur hian Southampton leh Tottenham boss hlui Mauricio Pochettino chu langsar ber a ni chho mek bawk. Kum 2013 January thla khan Southampton-in hetiang bawk dinhmun derthawng an hmachhawn lai khan Pochettino hian he club hi a lo enkawl tawh a ni. Khatih lai khan relegation zone chungah point pathum chauh lamin thla engemaw zat an lo awm a, mahse Pochettino-a'n mawhphurhna a lak hnuah Southampton hi relegation zone-ah an tla lut leh tawh lo a, 11-na dinhmun thleng an inhlangkai a ni. Kha season khan 14-na dinhmun luahtirin point panga ngawta a zangkhai zawkin an vawng him a ni.
Saints a enkawl tirh khan United chuan Southampton hi hneh mah se, Sir Alex Ferguson-a rilru a ti-hneh hle a. Argentine coach chuan inbiakna a neihnaah sawiin, Sir Alex-a season hnuhnung berah Southampton nen United tan match harsa tak an lo hmachhawn pui tawh thu leh match zawha press conference-ah Ferguson-a'n opponent hmachhawn har ber an nih thu a sawi lang hial a ni.
League Managers Association secretary hmangin Ferguson chuan lunch ei dun tura a phone number a dil thu leh, he inhmukhawm hi genius leh apprentice inkara inbiakna ṭha tak a nih thu Pochettino chuan a sawi a ni. Pochettino chuan, "United hian ngaihven ngai ṭhin mah se, enkawlna hunṭha tak a la thleng chho lo a ni. Engpawh nise, Sir Alex nena lunch kan ei dunna khan manager chungchang nen inzawmna a nei lo," tiin a sawi bawk.
