Aston Villa nen 4-4 a inelna hmuhnawm tak an hmang a, match tawp zawn stoppage time-ah goal hnih khungin point khat hmu hram mah se, Manchester United chu Premier League bottom three (relegation zone)-ah an tang tlat a ni. Tun season-a international break pahnihna an hmachhawn ṭan chiah tih hian managerial post-a Michael Carrick-a hmakhua chungchang sawi a ti-ultuk hle.
Match 10 an khelh hnuah United hi 18-naah awmin, hmun him aia point khata hnufual an ni a, hei hi 1986/87 season (20-na an luah ṭum) hnua match 10 hnu rama an table dinhmun chhe ber a ni. Man Utd-a defender lo ni ṭhin Gary Neville leh Phil Neville te chuan back four-a Leny Yoro leh Ayden Heaven te hmanga inkhelh chhunzawm zel a nih chuan, season tawpah club hi Premier League aṭangin an tla ngei ang tih warning an pe a ni.
Tun season-ah United tlarhnung rintlak loh zia a lang chiang em em a, Europe khawmualpuia league lian nga zingah inelna hrang hrang chawkawmin goal chhuah hnem ber an ni hial. Premier League match 10-ah ringawt pawh goal 19 lai an chhuah tawh a ni. Gary Neville chuan transfer window-a tlarhnung player an lakluh loh avangin an tuar mek tiin a sawi chhuak.
NBC Sports-a a sawinaah Gary Neville chuan, "Manchester United-in goal li ngawt an chhuah chhan chu transfer window chhung khan tlarhnung thuamchakna tur sum an sen loh vang a ni. Defender thar an mamawh tih mi zawng zawngin an hria a; mahse an la lo. Tun dinhmuna an defender neih mehte hian tihsual an nei sek mai a ni," tiin a sawi.
A sawi zawmnaah, "Kha match khartu defender-te kha chuan Championship lamah min tlantir ngei ngei dawn a ni. An tihsual hi en mah ta che u... Transfer window chhung khan defender lakluh ngei ngai a ni tih kan aupui chung chung a. Transfer budget te kha hmang hmaiin defender-te kha an lalut tur a ni," a ti bawk.
A unaupa Phil Neville pawhin he ngaihdan hi a thlawp hle a, "Gary sawi ang khan, Noussair Mazraoui, Leny Yoro, Ayden Heaven leh Patrick Dorgu te'n match kha an khar a ni. Kha back four khan relegation-ah a tlantir dawn che a ni. Kha back four khan manager i nihna aṭangin a bante tir dawn che a, kha back four khan Man United hi Premier League-ah a humhim zo lo ang," tiin a sawi.
Gary Neville chuan United manager inthlak ngun dan leh recruitment weakness chungchang sawizuiin, "A ngai bawk an ti nawn leh ṭhin a ni. Ruben Amorim, Erik ten Hag, Ole Gunnar Solskjaer, Carrick, Jose Mourinho, Louis van Gaal, David Moyes, Ralf Rangnick - heng zingah hian manager thiam tak tak, hlawhtlinna lo nei tawh te, manager naupang chak tak tak te leh club chanchin hrechiang tak player hlui te pawh an tel. Mahse engmah a hlawhtling thei chuang lo, a chhan chu player i lakluh sual a, i performance department leh recruitment department te an ṭha lo a, club hruaitu innghahna tling i nei lo a nih chuan i tlu chhe ngei ngei ang," tiin a sawi zui.
Kumin nipui bazar chhung khan United hian an budget £155million zawng zawng chu tlar laili thuam nan chauh an hmang a, Youri Tielemans, Andrey Santos leh Carlos Baleba te an lalut a ni. Hei hian defender lam hlamchhiahna avangin nghawng chhia a thlen mek a ni. Matchday squad-a inlan lo defender Lisandro Martinez pawhin squad thuamchak a nih loh avangin club board chu a lo dem tawh a, football director Jason Wilcox-a hming ngei tarlangin player thar lakluh a nih loh vangin a lo sawisel tawh a ni. Aston Villa manager Unai Emery phei chu hun tawp dawna an match thunun sa an thlahthlam tak avangin a thinrim hle a; mahse he inhnehtawkna hian international break inṭan dawnah United chu relegation zone-ah a dintir mek a ni.
