Old Trafford-a mi 10-a khel Tottenham nen an inhnehtawk ṭuma Manchester United ṭantuten inkhelh chhung leh a tawpa an team an lo au el (boo) na chuan "a tina hle" tih head coach Michael Carrick chuan a sawi a, chutih rualin he boruak harsa tak an paltlang thei chu a player-te a fak bawk.

First-half laihawl vel aṭang khan United khelh dan beisei a phak loh em avangin mualchhung mipui an lungawi lo ṭan a, league mawngphah aṭanga rawn inlan Spurs lakah tualchhung team hi siphur lo hlauh mah se, half-time-ah fan-te chuan au el chungin dressing room an pan tir a ni.

Minute 72-naah Bryan Mbeumo chuan United tan goal a khung a, Rodrigo Bentancur-a'n red card a hmuh zui bawk avangin United chuan hnehna an chang ngei dawn niin a lang hman. Mahse hun tawp stoppage time-ah Dominic Solanke chuan Spurs tan an siphurh a rawn rul hlauh a, inkhelh chu 1-1 in an tlip ta a ni.

Hei hian match tawpah mipuite au elna (jeers) a chawk chhuak zual sauh a. Carrick chuan fan-te rilru beidawnna chu a hriatthiampui thu sawiin, player-te tan erawh thil nuam a nih loh thu a sawi.

Carrick chuan, "Thil ruahman angin a kal tluang lo a nih chuan, mipuite chet dan hi ka hrethiam ṭhin a ni. Chiang takin a tina a, a tina hle bawk. Paltlang atan chuan a nuam lo ngei mai, mahse a chang chuan hetiang hi kan tawn tlang a ngai ṭhin, thil nih dan a ni ve hrim hrim bawk," tiin a sawi.

A sawi zawmnaah, "He club hi midang zawng zawng ang thovin ka ngai pawimawh a, a chang phei chuan a lutuka ngaih theih hial a ni. Mahse thinlung ṭha tak aṭanga rawn chhuak a ni a, chuvang chuan ka hrethiam vek a ni. Hetiang paltlang chu thil nuam a ni hauh lo na a, player-te hian ṭha takin an hmachhawn thiam niin ka hria," a ti.

Premier League match hnih a zawnin Old Trafford-ah mi 10-a khel tumpuiten goal an khung zui ta a. Solanke-a goal khung ṭum pawh hian Lisandro Martinez chu tharumah a inel pui hleihthei lo va, Sandro Tonali cross chu Solanke hian a tauh lut a ni. Mahse heti chung hian player-ten a beiseina an tithlawn anga ngaih chu Carrick hian a hnawl thung.

"A teuh lo mai, min tithual angin ka ngai lo, a chhan chu mihring kan nih miau avangin tihsual kan nei thei a ni. Tihsual a awm thei a, thil a kal fuh lo thei bawk. Keipawhin ka khelh lai khan match-ah tihsual ka lo nei fo tawh ṭhin," tiin Carrick chuan a sawi.

"Standard leh dinhmun tawk ṭheuh kan nei a, player-te pawhin theihna leh standard sang tak an nei a, thil a kal fuh loh chang chuan anmahni pawhin an tihsual an pawm mai ṭhin a ni. Engkim a ṭha vek e ti niawm fahranin zaninah hian tu mah an inhnukdawk lo va, ka chunga engkim tla anga kal mai a ni hek lo. Player-te hian team hi an ngaihtuah takzet a ni tih inkhelh kal dan aṭang pawh khan a hriat theih ang. First half chhung khan hun khirh tak an paltlang a, chu chu hneh theih tura an thawhrim dan aṭang khan an inpek zia a chiang hle.

"Chuvangin tihsual an neih vang ngawtin ka lakah beiseina an tithlawn anga ngaihna ka nei lo. A aia ṭha zawk kan nih theih nan kan inṭanpui tawn a ngai a, anni kaihhruai a puih zel chu ka mawhphurhna a ni," a ti bawk.