Old Trafford-ah Manchester United chuan Tottenham chu mualneitu niin an mikhual a, bul ṭan ṭha tawk lo mah se hma an hruai hnuah 1-1 in an inhnehtawkpui. He inkhelah hian Bryan Mbeumo-a goal hmangin United-in hma an hruai a, Tottenham midfielder Rodrigo Bentancur chuan Luke Shaw a tauh avangin hnawhchhuah a tawk zui bawk. Mahse, mi 10 chauhva khel Spurs lakah hian United chuan an chakna an humhim thei ta lo a, Dominic Solanke chuan hun tawp dawn lamah Tottenham tan an siphurh a rawn sut ta a ni.
First-half leh inkhelh tawp rualin Old Trafford-a ṭhuthmun phawrh fan-te chuan an team khelh danah an lungawi loh zia lantirin an au el (boo) nasa hle a. Inkhelh ṭan tirh lamah Spurs an chungnung zawk hle a, pundit hrang hrangte chuan United player-te chu inrintawkna nei lo tiin sawisel mah se, manager Michael Carrick erawh chuan an chet muan chhan chu inrintawkna tlachham vang a nih a pawm lo thung.
Carrick chuan match zawhah sawiin, "Inrintawkna tlachham vang a nih ka ring lo. Mahse inkhelh hi i hriat loh karin i kut aṭangin a thlawkchhuak thut thei a ni. Inkhelhah khan kan inhai chhuak leh thei a, dinhmun ṭha takah kan inhung lut bawk a - heti chung si a kan chak zo ta lo hi thil pawi ber leh beidawnthlak ber a ni," a ti.
Fans-te au elna chungchang an zawhna chu chhangin Carrick chuan, "Thil nuam a ni lova, he club hi ka thinlung zawng zawngin ka ngaihsak avangin min tina takzet a ni. Mahse an beidawnna leh an rilru natna chu ka hriatthiampui em em. Thudik chu a nihna ang hian kan pawm a ngai a, hnehna chan leh zung zung hi kan tihmakmawh a ni," tiin a sawi.
Chutih laiin, Sky Sports pundit leh Tottenham midfielder hlui Jamie Redknapp chuan Carrick-a ngaihdan hi a ṭawmpui lo hle a, inrintawkna neih loh chu United buaina zinga pakhat chauh a nih thu a sawi. Tun season-ah Premier League game 6 aṭangin point 6 chauh an la hmu a, hei hi kum 40 chhunga hetiang hun laia an point hmuh tlem ber a tling hial a ni.
Redknapp chuan United khelh dan chu na takin a sawisel a: "Carabao Cup-ah Brighton lakah 2-0 in hma an hruai a, 3-2 in an tlawm leh a; hetiang thil hi Old Trafford-ah hian a thleng ngai lo, mahse tun squad lakah hi chuan a thleng reng mai. Tlar laili-ah khan inzawmna ṭha ka hmu lo a, inrintawkna, ruahmanna emaw khelh phung nghet reng reng an nei lo. Tlar hnung aṭanga ball in-pass chhuah kawngah pawh Spurs khan hmun tinah an khum vek a ni. Hei hi tun season-a an buaina ngai reng a la ni zui a ni. An tha thawh a tawk lo va, hma lam nawrnaah mumalna an nei lo bawk. Squad hi a ṭha tawkin a chak tawk lo a, Michael-a [Carrick] hian ṭanpuina a mamawh takzet a ni," tiin a sawi chhuak hial.
Tottenham winger hlui Chris Waddle pawhin BBC Radio 5 Live-ah United chuan inrintawkna an tlachham tih a sawi ve bawk. Waddle chuan, "Spurs kha first-half-ah khan an khel ṭha takzet a, beiseina an siam sang hle. Second half-ah Man Utd-in an nawr na chho a. Tottenham hian an khel ṭha tawk a, United erawh chuan hna thawh tur tam tak an la nei a ni. Inrintawkna an hloh tawh a, an neih let leh a ngai. Mahse tun dinhmunah chuan team pahnihte hian tun season chhungin hma an sawn leh ka beisei, inrintawkna an neih let a ngai mai a ni," tiin a thlir dan a tarlang ve bawk.
