International break chhung khan Manchester United manager Michael Carrick chuan an khelh dan endikin, team chhungah "mei a alh dawn" tiin thawhrimna leh phurna thar khelmualah phochhuah a tiam a. Mahse, Tottenham Hotspur an hmachhawn ṭum khan khelmuala thawhrimna phochhuah a hnekin, touchline bula khingpuite nena an inbakkaih ṭum chiah khan Carrick-a naute hi an 'sa' ve a ni mai e.
Old Trafford-a inkhelah hian United an khel chhe em em a, tha leh zung senna leh theihna kawngah an tlahniam hle. First half minute 25 vel a ral meuh chuan mualneitu fan-te au elna (boos) a ri chho nghal rum rum a. Khatih hun chhung khan Tottenham chuan ball possession 66% neiin, goal zawnah vawi nga lai pet mah se United chuan vawikhat mah an pet lo va, United box chhungah ball vawi 13 an khawih hman laiin United erawhin final third-ah pass khat chiah an nei hman thung.
Tottenham rawlthar Lucas Bergvall-a'n Bruno Fernandes leh Matheus Cunha te inkarah awlsam taka kal tlangin yard 25 a hla aṭanga ball a rawn khawih lai pawhin United captain leh Cunha te hian chet an thawh ṭha peih meuh lo. Youri Tielemans a talbuai a, goalkeeper Senne Lammens a pet sual zingin Harry Maguire lah bum kual a tawk ngun hle bawk. Dominic Solanke leh Mohammed Kudus ten chance ṭha tak tak an thelh hlauh zawk a ni.
Second half inṭan hnu minute 60 hmain Carrick chuan bench aṭangin player lak thar Carlos Baleba (£70m), Diogo Dalot leh Joshua Zirkzee te a rawn luhtir a. Baleba-a rawn luh hian danglamna a rawn thlen nghal a, Cunha-a pass pek chu Bryan Mbeumo chuan fing takin a herpui a, goal-ah chantirin United hian hma an hruai ta hlauh mai a ni.
Goal an chhuah hnu hian Spurs player-te an phili chho va, Jean Paul van Hecke-a'n Fernandes a nawr hrep hnuah, Luke Shaw-a chunga wild scissor tackle a neih leh Shaw-a chunga a lu a thun avangin Rodrigo Bentancur chu red card hmuin hnawhchhuah a ni zui a. Hemi avang hian touchline bulah an inbakkaih zui hrep nghe nghe a ni.
Tottenham mi 10 chauh an nih takah chuan United tan hnehna chan a chiang tawh viau tura ngaih a ni a. Mahse, mi pakhat an kim lo chung pawhin Spurs chuan United tlarhnung phuarphawng tak chu an la chhaih buai zui reng tho a ni. Hun tawp dawn injury-time ah Dominic Solanke chuan Lisandro Martinez chu tharumah hnehin tauh goal a khung ta a, 1-1 in match a tawp ta der a ni.
Tottenham analyst-te phei chuan touchline aṭangin United player zawi lutukte chu "an nem lutuk (soft, soft)" tiin an lo sawi hial a, hei hian Carrick-a hnuaia United dinhmun chhiat zia a pholang chiang hle. United hian tun season league match ruk khelhah point ruk chauh an la hmu a, an khelhpui laia league mawngphaha awm ve ve Fulham leh Tottenham te lakah a zawnin 1-1 bawkin draw an nei a ni.
Carrick tan hian dinhmun a rit chho hle dawn a, a chhan chu khualmualah Atletico Madrid, Leeds United leh Como te an hmachhawn a ngai zawn dawn si a, United hian insiamṭhat vat an mamawh takzet a ni.
