Manchester United midfielder Youri Tielemans chu a khelhpui ṭhin Jamie Vardy chuan fakna ṭawngkam hlu tak a hlan.
Heng player pahnihte hi Leicester City-ah khelmual inṭawmin match 156 ngawt an khel dun a, goal pariat lai an thawkchhuak dun bawk a ni.
He Belgium international hi Monaco-a rawlthar theihna ngah tak a nih laiin Foxes hian an ngaihven ṭan a, January 2019 khan loan-in King Power Stadium a pan phawt a, season tawpah an la nghet zui ta a nih kha. Tielemans hian kum li leh a chanve chhung zet Leicester City-ah hun hmangin FA Cup leh Community Shield nomawite a chawipui hman a. Kum 2023-a Premier League aṭanga an tlak tak hnu khan club hi chhuahsanin Aston Villa a pan a ni.
Villa Park-ah pawh he Belgian hian theihna ropui tak pholang chhunzawmin, season liam taa Europa League nomawi an lak theih nan tha hnem a ngai hle a. Kumin nipuiah INEOS-in midfield thuamṭhat an beihna kawngah Old Trafford a rawn pan ta a ni. Vardy chuan Tielemans nena an lo inkhelh dun ṭhin laia a tawn hriatte chu a sawichhuak ta a ni.
TikTok-a a sawinaah, Vardy chuan Tielemans chu Leicester City tana a lo khelhpui tawh zinga player ṭha ber pathumna (third-best) a nih thu a tarlang. Vardy chuan, "Youri Tielemans kha chuan engkim a nei a ni. Midfielder pakhat tana i mamawh zawng zawng - ball pass te, thawhrimna, shot ṭha leh in-tackle thlengin a nei kim vek a ni," tiin a sawi.
He Belgian midfielder hi Premier League title an lakpui dun N'Golo Kante leh Riyad Mahrez te aia chungnung zawka Vardy-a'n a thlang hian mi tam tak a barakhaih hle a, Kante leh Mahrez te hi a thlannaah palina leh pangana an ni thung. Kante chungchang sawiin he English striker chuan, "N'Golo Kante chu a hna thawh kawngah chuan a ṭha ber a ni. Ball chhuhsak leh i mamawh a nih chuan N'Golo-ah hian i innghat pumhlum thei ang," a ti.
Mahse, Vardy-a list-ah hian pahnihnaa awm James Maddison leh pakhatna luah tu Leicester legend Wes Morgan te erawh Tielemans hian a pha lo thung a ni.
Theatre of Dreams a thlen aṭanga Michael Carrick-a'n match tinah bul a ṭantir ziah hian United manager-in a ngaihhlut zia a tarlang chiang hle. Kum 2026 FIFA World Cup a khelh avangin pre-season training zawm tlai deuh mah se, a theihna ngaiah a kir leh thuai a ni.
Kum 29 mi hian Premier League match hmasa bera Hull City laka 2-0 a an tlawm ṭum khan nipui lakluh thar Andrey Santos nen bul an ṭan dun a. Hemi hnu Ipswich Town 5-2 a an hneh ṭum aṭangin Santos-a aiah Kobbie Mainoo a rawn lut a, Tielemans leh Mainoo te hian Carrick-a midfield laili luahin Premier League leh Champions League-ah inkawp nghet tak an rawn din chho ta a ni. EFL Cup-a Brighton laka 3-2 a an tlawm ṭum erawh khan Carrick hian opening day-a a midfield hman Santos leh Tielemans te bawk kha a chhawr leh thung.
Inelna hrang hrangah match pasarih a inlan tawhah Tielemans hian assist vawi hnih a nei tawh a, Inrinni-a Tottenham Hotspur an hmachhawn hunah pawh bul a ṭan leh ngei beisei a ni. Tunah hian player lak thar dang Carlos Baleba chu hliam damin a rawn inralring chho ve leh mek bawk a. Chutih rualin ni 30 chhung leka match riat ngawt mai United-in an hmachhawn chhoh dawn avangin, midfield player chhawr theih ṭha tak tak an ngah hi Carrick tan chuan thil lawmawm tak a tling a ni.
