Manchester United-in mahni mual Old Trafford-ah Aston Villa an mikhual tur chu midfielder hlui Tom Cleverley tan boruak danglam tak a ni. Cleverley hian vawi khat chu Manchester United-a a awm laia boruak duhawm lo (negativity) tak inlehvel aṭanga a chhuak thei ta chu a hahdam hle thu a lo sawi chhuak tawh a ni.
Old Trafford-a hun harsa tak a hman hnuah he midfielder hlui hian loan hmangin Aston Villa a pan a, he inthlak thleng hi a boruak thlirin kal zawn a ni a, a nihna takah chuan thutlukna awmze nei leh dik tak (common sense) a nih thu a sawi. Cleverley hi kum 12 a nih aṭangin United academy-ah a inlin a, rawlthar rual aṭangin senior team-ah a rawn inhlangkai zui a ni.
United-a a awm chhung hian loan-in club dangah hun a hmang nual a, Watford leh Wigan Athletic-ah te hian loan-in a inlan a ni. Hemi hnu hian Villa panin, Villa-a a chet ṭhat tak avangin Everton chuan a nghetin an lalut ta a ni. Red Devils tan hian match 79 inlanin goal 5 a khung a, midang pet luh tur vawi 7 a siamsak (assist) hman a ni.
Mahse kum 2014-a loan-a a chhuah lai khan club chhunga boruak pik tak leh boruak duhawm lo tak awm avangin, Manchester chhuahsan chu a phur em em thung. Kum 12 liam taa transfer deadline-day-a Villa a zawm hnuah Cleverley chuan: "Man United-a ka vela boruak duhawm lo leh chhe tak tak awm ṭhinte aṭanga ka chhuak thei hi ka hlim hle a, Aston Villa-a tun season ka hmachhawn tur hi ka phur takzet a ni," tiin a sawi.
Sawi chhunzawmin: "Season liam taa player zawng zawng khan an inrintawkna a sang hle tiin sawi se chuan dawt an sawi a ni ang. Keimah chauh ka ni lo. Squad pum pui boruak khan player dang leh fan-te thlengin a kangkai vek a ni. Kan tan season harsa tak a ni a, mahse chutiang boruak chhe tak lakah chuan ka fihlim ta a, hei hi chona thar a ni a, ṭan lak vat vat ka chak tawh a ni," tiin a sawi.
Fan-te sawiselna a tawrh chungchang sawiin: "Infiammi tupawhin mahni fan-te aṭanga sawiselna an tawng a nih chuan an rilru a na ve ngei ang, mahse chu chuan keimahah mi tuarchhel zawk min chhuah thung. Twitter-a mi tuchuan emaw a sawi mai vangin player chhe takah i chang ngawt dawn lo," tiin a sawi bawk.
United-ah hun pik tak paltlang mah se, Cleverley chuan a manager enkawltu Louis van Gaal-a mizia a fak hle thung. "Ani chu ka chungah a tlang reng ṭhin. Footballer tupawhin chawlhkar tin inkhelhna hun ṭha ber hmuh an duh a, chuvang chuan he insawnna hi keima tan chuan thutlukna awm tak leh dik tak a ni," tiin a sawi.
2014/15 campaign tawpah a contract a zawh dawn thu sawichhuakin, Old Trafford-a a hun a tawp tawh nia a hriat thu a sawi lang bawk. "Kum tawpah ka contract a tawp dawn a, thudik tak sawi chuan he club tan hian ka khelh leh pawh ka ring tawh lo," tiin a lo sawi tawh a ni.
Villa-ah hun hlawhtling tak hmangin match 37 a khelhah goal 3 a khung a, FA Cup final-ah Arsenal laka an tlawm avangin pahnihna (runners-up) pingal lawmman an dawng a, hemi hnu hian Everton hi a zawm ta a ni. Everton-ah hian season hnih awmin match 42 a khel a, goal 8-ah a inrawlh (goal contribution) a ni. Hemi hnu hian Watford-ah a career tihtawpin, he club-ah hian a theihna sang ber phawrhin goal 19 a khung a, assist vawi 15 a nei bawk.
Player anga a chawlh hnu hian coaching hna thawhin, kum 2024 aṭanga 2025 inkar khan Watford head coach hna a chelh a, tunah hian Plymouth Argyle head coach hna a chelh mek a ni.
