Manchester United captain hlui Wayne Rooney-a fapa Kai Rooney chuan tun season-ah academy team hrang hrangah inlanin hun ṭha a hmu chho mek a. JJ Gabriel-a hmabak chiang lo leh head coach Michael Carrick-a ruahmanna thar siam avangin senior team zawm a beiseina a sang sawt hle a ni.
Kumin November thlaa kum 17 tling tur Kai Rooney hian season liam ta khan FA Youth Cup-ah Old Trafford khelmualah a vawikhat nan a lo inlan tawh a. Kar liam ta khan UEFA Youth League-ah a debut siamin, tun season Under-18 Premier League match hmasa bera Nottingham Forest nen 1-1 a an inhnehtawk ṭum khan goal a khung nghal a ni.
He rawlthar hian Forest bawk an hmachhawn ṭumin Under-21 tan a debut a siam zui a, goal khungtu Samuel Lusale aia rawn lutin 3-2 a an tlawm ṭum khan a inlan a ni. Darren Fletcher-a enkawl Under-18 team-in Liverpool an hmachhawn turah pawh a inlan leh ngei beisei a ni bawk.
Pre-season-a senior team tana lo inlan tawh wonderkid JJ Gabriel-a'n September thla khan Old Trafford chhuahsan a duh thu a lo sawi tak avangin Rooney hian hun ṭha hi a hmuh phah nia ngaih a ni. Rooney aia thla 11 a naupang Gabriel hian Youth League match hmasaberah Sabah lakah hat-trick a khung a, mahse Atletico Madrid leh Como an hmachhawn ṭum erawh chuan squad-ah telh a ni ta lo a ni. Italy-a Como laka 2-1 a an tlawm ṭum khan Rooney hi bench-ah a ṭhu a, he match-ah hian Jack Fletcher chuan United tan goal a khung a ni.
Kumin nipui bazar chhung khan academy player ṭhenkhat an chhuah tak avangin United hian tlarhmaah duhthawh tur an nei tlem hle a. Louie Bradbury chuan Stoke City a zawm fel tawh a, Chido Obi pawh Willem II-ah loan-in a chhuak bawk a ni. Chuvang chuan Rooney hi false nine position-ah chhawr chhoh zel a ni a.
Senior team-a rawlthar ten inthlakthleng awlsam zawk an neih theih nan Carrick chuan academy coach-te nen thawhdunna a ṭan tawh a ni. Under-21 boss Adam Lawrence pawhin Carrick-a tactics 4-2-3-1 hman ang tak hi a hmang chho ve ta a ni. A tirah chuan he ruahmanna hi Gabriel-a'n number 10 position-a a khelh theih nan nia ngaih ni mah se, tunah erawh Rooney-a tana false nine-a khelhna kawng sialsaktu a ni leh ta zawk a ni.
First team-ah Benjamin Sesko a hliam bakah Obi-a'n loan-a club a chhuahsan tak avangin, United hian striker pangngai tak (orthodox No. 9) hmang mai lovin tactics dang dang an ti chhin vel mek a. Tun dinhmunah chuan Under-18 match-te hi an ngaihpawimawh ber a ni rih a, tun season match 6 an khelh tawhah 4 chak tawhin, Inrinni hian Liverpool an hmachhawn leh dawn a ni.
