Manchester United fan-te chu Pathiannia Old Trafford-a Bournemouth an hmachhawn hunah harsatna leh khawmuanna lian tak an tawk thei dawn tih fimkhur tura hrilh an ni. Hei hi Metrolink tram line-te enphawthen hna (engineering works) thawh mek a nih avanga chawlkar hnih chhung khar a nih vang a ni.
Metrolink aṭanga vaivak ṭhin fan-te chuan kalkawng dang an zawn a ngai dawn a, hei hian tlai dar 2:00-a match ṭan hmain stadium velah lirthei tawtna nasa tak a thlen phah tura ngaih a ni.
Metrolink hotute chuan thuchhuah siamin Altrincham, Trafford Park leh Eccles line-ah te tram a tlan dawn lo tih an tarlang. Heng line-te hi October 19 khan enphawthen hna thawk turin khar a ni a, November 1 hma chuan hawn leh a ni dawn lo a ni. Airport leh East Didsbury line-ah te pawh tram tlan zat tihhniam a ni a, heng line aṭang hian Manchester city centre thleng tlang thei tram a awm dawn lo bawk.
Match entu tur mipuite chu, inkhelh hmaa stadium an thlen hman ngei theih nan a hma aia thui lo berah darkar khat hma a chhuak turin fuih an ni.
Bee Network chuan an website-ah thuchhuah siamin, "Old Trafford pana kal tur leh haw tur football fan-te puih nan, vantlang zualkawi hmanga zinna tur dang hrang hrang buatsaih a ni a. Hemi atan hian replacement bus, Bee Network bus, rel (train) ticket hman theihna te leh football fan-te puihna tur dedicated shuttle bus-te an awm ang.
"Tluang taka vaivak thei turin hun nei tam ula. Stadium i thlen hman ngei nan a hma aia darkar khat hmaa chhuak turin kan chhawp chhuak a ni," tiin an tarlang.
Dedicated shuttle bus-te hi Altrincham Interchange (Stand D) aṭangin zing dar 10:00 aṭanga chhun 12:00 inkarah minute 20 dan zelah a chhuak ang a, Navigation Road, De Quincey Road leh Stanley Mount ah te a chawl ang. Hemi hnu hian chhun 12:00 aṭanga 12:30 inkarah (a chhuak hnuhnung ber) minute 5 dan zelah a chhuak thung ang. Match zawhah Altrincham pan turte chuan Tesco pawn Chester Road aṭangin bus an chuang thei ang.
Manchester city centre aṭanga Old Trafford pan tur fan-te tan, Piccadilly Gardens (stand G) aṭangin zing dar 10:00 aṭangin minute 20 dan zelah shuttle bus a chhuak ang a, hemi hnu hian chhun dar 1:25 ah a chhuak hnuhnung ber thlengin minute 5 dan zelah a chhuak zui ang. Match zawhah city centre lama kir tur fan-te chuan Chester Road (Ford Garage pawn) emaw E2 car park bula Wharfside Way aṭangin bus an chuang leh thei ang.
Heng shuttle bus-ah hian mi pakhat kal duhna atan ticket hi £2 man a ni ang a, bus-te hi a chhung khah veleh a chhuak zui zel dawn tih transport boss-te chuan an sawi. Hei bakah hian 263 service atan bus belh a ni bawk ang. Kalkawng dang hman theih zawng zawng hi Bee Network website-ah tarlan vek a ni.
