Old Trafford-a Bournemouth laka 3-0 ngawta Manchester United an tlawm hnuin, fan-ten player-te an au el (booed) a, mahse he thil thleng hi dressing room-ah player-te nen thupui berah an hmang nghal lo tih head coach Michael Carrick chuan a sawi.

Kar khat chhunga a vawihnih nan Red Devils hi an sawp tlawm a ni a, a zawnin match riat (8) chhung chak hmel an hmu ta lo a ni. Match zawha khelmual hel a, supporter-te hnenah lawmthu a va sawi laiin Stretford End-a awm mipuite chuan Carrick-a hming an lo au tuar tuar a. Mahse head coach hetianga an lo lawm lai hian, tunnel-a a luh rualin fan-te chuan player-te chu thinrim takin an lo au el thung a ni.

Tunnel aṭangin Carrick hian mipuite au elna hi a hria a, game zawhah player ṭhenkhat mimalin a be bawk. Mahse he thil hi dressing room-ah team mualpho taka an tlawm hnua sawiho vak chi a nih loh thu sawiin, player-te pawhin chak loh zawn zet chu hrehawm an ti hle tih a sawi a ni.

Carrick chuan, "Thudik tak sawi chuan, match zawha dressing room-a sawi zui vak chi a ni lo. Tun dinhmunah dressing room-ah rilru a hnual hle a, beidawk tak tak an tam a, mualpho taka awm chu player tam tak tan thil hrehawm tak a ni. Player-te hian engmah pawi an ti lo tihte, hetiang dinhmuna awm hi an duh bik tihte a ni lo. Hetiang dinhmun harsatah hian kan vaiin kan ding mek a ni," tiin a sawi.

A sawi zawmnaah, "Ka biak tawh player-te—ka la be kim vek lo na a, ka biak tawh ṭhenkhat phei chu an rilru a khawih hle a, inkhelah pawh thil duhawm lo kal chho hian engtiang chiahin nge min nghawng tih a lang chiang hle a ni. Game a tawp dan leh stadium-a boruak awm dan te chu hriatthiam tumin hun kan hmang zui bawk," a ti.

Match chhungin Carrick hian fan-te thlawpna ṭha tak a hmu a, mahse fan-te hian player-te chauh lo pawh club neitu Glazer chhungkua leh Sir Jim Ratcliffe te, bakah director of football Jason Wilcox te pawh an sawisel tuar tuar a ni. Wilcox leh chief executive Omar Berrada te chuan sawiselna hmachhawn nasa mah se ngawi rengin an awm zui a ni. Wilcox hi club-a a awm chhungin chanchinbumite hmaa a la ṭawngchhuak ngai lova, Berrada pawh March 2025-a stadium thar ruahmanna an puan hnua a la ṭawngchhuah miah loh avangin an sawiselna a lian hle.

Carrick chuan a mimal laka fan-te hmangaihna lantir chungchang sawiin, "Rilru a inpolh nawk mai. Fan-te aṭang hian hetiang laka support hi ka beisei lo zet a, mahse an laka ka rilru vawng reng leh inzawmna ṭha kan nei hi ka tan chuan thil ropui tak a ni. Fan-te laka ka zahna ka sawi zing lutuk hi an nin tawh pawh ka ring, mahse hetih hun thim chhunga an support min lantir hi ka tan thil hlu tak a ni. Hetiang hun harsa kara hetiang thil hmachhawn tur awm hi hrethiam turin rilru a inpolh nawk a ni," tiin a sawi.

Hotu lute mipuite hmaa an ṭawng chhuah a hun tawh leh tawh loh zawhna chhangin, Carrick chuan chu chu amah sawi tur a nih loh thu leh a mawhphurhna chu khelmual chhunga team aiawh leh manager a nihna ang bera ṭawngchhuah a nih thu a sawi zui bawk.