Manchester United left-back hlui Tyrell Malacia chuan Carrington-a first-team aṭanga hnawhchhuah a nih hnu a youth team-te nena training a neih a ngai ṭhin chung pawhin, Old Trafford-a a hun hman tawhah inchhirna pakhatmah a neih loh thu a sawi.

Kum 27 mi, Major League Soccer club FC Cincinnati-a khel mek Dutch left-back hian BBC Sport-a exclusive interview a neihnaah United-a kum nga chhung a awm dan chungchang a sawichhuak a. United nena an contract a zawh hnuin, September thla khan MLS club FC Cincinnati hi free transfer-in a zawm a ni.

Malacia chuan, "Eng ah mah inchhirna ka nei lo. A ṭha lam zawnga a thleng leh a nih pawhin hetiang bawk hian ka ti leh ang, a chhan chu hetiang hi thleng lo se chuan tun dinhmuna ka nihna hi ka thleng dawn lo a ni," tiin a sawi.

Kum 2022 nipui khan Feyenoord aṭangin £13m-in Malacia hi Manchester United-in an lalut a, Erik ten Hag-a hnuaia a season hmasaberah match 39 inlanin EFL Cup nomawi an chawi a ni. Mahse a khup hliam avangin vawihnih ngawt zai a ngai a, thla 18 zet khelmual a chhuahsan a ngai ta a ni. Hemi hnu season thum chhungin United tan match 11 chauh a khel zui a, PSV-ah loan-in a chhuak zui bawk.

Kum 2025 nipuia PSV aṭanga a rawn kir leh khan, manager thar Ruben Amorim-a hnuaiah senior squad aṭanga hrana training nei tura hrilh player panga (Antony, Garnacho, Sancho leh Marcus Rashford) te zingah a tel a. Player dangten club an chhuahsan hnuah pawh Malacia hi a la awm chhunzawm a, Under-21, Under-18 leh Under-17 team-te nen training a nei ṭhin a ni.

Hemi chungchang sawiin Malacia chuan, "Kha thil kha khawi aṭanga rawn chhuak nge a nih ka hre lo, Ruben-a hnen aṭanga rawn kal nge hotu sang zawkte aṭang tih pawh ka hre lo. Mahse engmah ka sawisel lova, rual pariat tlemte nena training neih a harsa ṭhin chung pawhin ka hna ka thawk zawm char char a ni. A harsa hle a, rilru tan phei chuan a harsa zual a ni," tiin a sawi.

September 2025 tawm lam khan first team-ah lakluh leh a ni a, Newcastle lakah vawihnih bench aṭangin a rawn inlan a, May thlaa Brighton nen an inkhelh hnuah United a chhuahsan ta a ni. January thla khan chhuah a lo tum tawh a, mahse Luke Shaw a hliam thut thilthu-ah left-back backup a ngai dawn avangin head coach Michael Carrick chuan chhuah a lo phal lo a ni.

"Kha thutlukna kha pawm a harsa hle. 'Ka khel dawn bawk si lo va, chhuah an phal bawk si lo va, helaia ka cham ve reng chhan tur hi eng nge ni' ka ti hial a. Mahse Carrick-a'n chhan leh vang min hrilhfiah hnuah ka hrethiam ta a ni," tiin Malacia chuan a sawi.

FC Cincinnati hian September 18 khan kum 2027 June thleng daih contract ziakin an lakluh thu an puang a, season khat dang pawhsei theihna a tel bawk. Malacia hian Nilainia D.C. United 2-1 a an hneh ṭum khan a zawnin match 4 bul a ṭan ta a, hei hi September 2022 hnua hetiang zat match a zawna a bul a ṭan leh hmasak ber a ni.

Play-off hmun chang tur a um mek Cincinnati-ah hian Malacia chuan match khelh tam a chak hle a, "Game tam tak ka khelh theih poh leh ka tan a ṭha a ni. Hun rei tak ka chawlh tak avangin match khelh tam ber ka duh a ni," tiin a sawi bawk.