Bournemouth laka 3-0 a an tlawm ṭumin, Manchester United head coach Michael Carrick chuan thutlukna pawimawh leh lian tak a siam a. An team captain Bruno Fernandes chu a tir aṭanga a khelhtir loh bakah, substitute hmang pawhin minute khat pawh khelmualah a luhchhuahtir lo hrim hrim a ni.

Como nena an inkhelh zawha captain Fernandes-a'n team tactics chungchanga sawiselna a neih hnu khan, starting lineup-ah a inlan lo a nih pawhin mak ti lutuk lo tur an awm nual tawh a. Chu mai bakah, tun hnaiah a khelh ṭhat tawk loh avangin bul ṭan a phu zawk lo hrim hrim nia ngaitu pawh an awm nual a ni. Mahse, tuman he Portugal midfielder hi substitute hmang zawng pawha mual chhunga a luhchhuahtir eih loh hi an beisei lawk bik lo hle.

Match zawhah club media lamin Bruno Fernandes a luhchhuahtir loh chhan chungchang a zawhna chu Carrick hian zep nei lovin tlang takin a chhang a. Carrick chuan, "Inkhelh chhung hian match chhe mek pawt ding tur leh game hmelhmang thlak danglam nan thutlukna siam a ngaihna hun a awm ṭhin. Vawiina kan thutlukna siam takte pawh kha hetiang zawnga siam hi a ni," tiin a sawi. Head coach hian Fernandes-a chungchang hi thui zawk sawi chhunzawm duh lovin, a thutlukna siamah chuan a ding nghet tlat a ni.

United-in 3-0 a an hneh loh match-ah hian Carrick chuan player thlakna vawi li (substitutions 4) a hmang a. Half-time-ah Youri Tielemans thlakin Matheus Cunha a luhtir a, Fernandes aia Cunha a thlang zawk hian thawm a ti ring hle a ni. Hemi hnu hian tlarhnung venhim nan Lisandro Martinez a luhtir a, Bournemouth-in goal thumna an khung hnuah Joshua Zirkzee leh rawlthar Shea Lacey te chu mualchhunga a luhtir leh a ni.

Hetianga Fernandes-a a chhawr miah lo hi Carrick chuan a hriat miah lohin captain Bruno hi a hum hram zawk nia ngai an awm bawk. Kar laia team tactics a sawisel avangin Manchester United ṭantute lungawilohna a hlawh hle a, khelmuala a rawn inlan a nih chuan fan-te aṭangin boruak duhawm lo leh au elna (boos) nasa tak a tawk thei tlat a ni. Heti hi ni mah se, point thum pawimawh tak an chan tak avangin Carrick-a thutlukna siam hi a dik ber em tih chungchangah fan-te ngaihdan a inthlau hle thung.